Еўрапе́йскае ра́дыё для Белару́сі, ЕРБ — міжнародная радыёстанцыя з сядзібай у Варшаве, якая выпускае ў эфір навіны, інфармацыйныя і забаўляльныя перадачы з 26 лютага 2006[1]. ЕРБ працуе на ўльтракароткіх хвалях і ў FM-дыяпазоне, а таксама праз спадарожнік і Інтэрнэт.
Дэклараванай мэтай радыёстанцыі з’яўляецца распаўсюджванне сярод беларускіх слухачоў актуальнай, сучаснай, незалежнай і сапраўднай інфармацыі, а таксама еўрапейскіх дэмакратычных каштоўнасцей. Акрамя таго, праэкт скіраваны на развіццё новага пакалення журналістаў, якія будуць здольныя да прафесійнай працы на Беларусі падчас пераходнага перыяду да дэмакратыі і вольнага рынку.
З пачатку 2007 года і да лютага 2011 года галоўнай рэдактаркай Еўрапейскага Радыё для Беларусі была Юлія Слуцкая.
Еўрапейскае Радыё для Беларусі — гэта некамерцыйная арганізацыя, заснаваная ў верасні 2005 ў Варшаве. Яе ўдзельнікамі сталі беларускія журналісты і няўрадавыя арганізацыі з Польшчы, Літвы і Чэхіі. Члены Беларускай асацыяцыі журналістаў (БАЖ) актыўна спрыялі з’яўленню радыёстанцыі.
Праграмы рыхтуюцца камандай беларускіх журналістаў у Варшаве і Мінску, а таксама сеткай рэпарцёраў у абласцях Беларусі.
Ядром каманды сталі былыя супрацоўнікі іншых радыёстанцый, напрыклад, зачыненай беларускімі ўладамі ў 1996 Радыё 101,2 FM, Радыё Свабодная Еўропа, Польскага Радыё, Радыё Рацыя.
ЕРБ — гэта забаўляльна-інфармацыйная радыёстанцыя. Яе мэтавай аўдыторыяй з’яўляецца ў першую чаргу моладзь ва ўзросце 18–35 гадоў.
Радыё працуе 24 гадзіны на дзень. Кожная гадзіна пачынаецца з выпуску навін працягласцю каля 3 хвілін, а таксама кожныя паўгадзіны выходзіць кароткі агляд апошніх навін. Да таго ж, у эфіры гучаць эканамічныя, культурныя, спартыўныя праграмы, каментары экспертаў па шырокім коле разнастайных пытанняў. Госці і ўдзельнікі перадач на ЕРБ з’яўляюцца вядомымі палітыкамі, пазнавальнымі грамадскімі асобамі, прадстаўнікамі незалежных молодзевых груп і арганізацый. ЕРБ таксама прэзентуе экстрэныя выпускі навін пры неабходнасці.
Значную частку эфіру займае сусветная і беларуская музыка. ЕРБ рэалізуе шэраг праэктаў па падтрымцы беларускіх музыкантаў, напрыклад, штогод ладзіць фестывалі «Даём рады»[2], «Права быць вольным»/«Be Free» ва Украіне, сумесна з грамадскай кампаніяй «Будзьма беларусамі!» у 2009 годзе выдала складанку «Budzma The Best Rock / Budzma The Best Rock/New», на якую трапілі ў тым ліку пераможцы адбору на фестываль[3][4].
ЕРБ выпускае штодзённую інфармацыйную праграму «ЕўраZOOM». Гэтая перадача, скіраваная на моладзь, нясе ідэю прысутнасці Беларусі ў палітычнай і культурнай прасторы Еўропы.
Са жніўня 2020 года па загаду Міністэрства інфармацыі Рэспублікі Беларусь доступ на сайт радыё http://euroradio.fm у краіне абмежаваны за асвятленне рэсурсам пратэстаў у Беларусі[5][6]. З ліпеня 2021 года рэжым Лукашэнкі(бел. (тар.)) бел. блакіруе доступ і да люстэрка сайта[7]. 5 ліпеня 2021 года пастановай Савета Міністраў быў зачынены і карэспандэнцкі пункт радыё ў Мінску[8].
1. на хвалях FM:
у Брэсце і на захадзе Брэсцкай вобласці:
у Пінску і на паўднёвым усходзе Брэсцкай вобласці:
2. на ўльтракароткіх хвалях нізкім:
на беларуска-літоўскім памежжы:
3. праз спадарожнік (24 гадзіны на дзень):
4. праз Інтэрнэт (24 гадзіны на дзень):
Інтэрнэт-старонка пашырае і паглыбляе змест радыёэфіру, а таксама змяшчае арыгінальную інфармацыю, якая выходзіць па-за межы эфіру. Апошнія навіны, спецыяльныя справаздачы, музычныя праграмы, інтэрв’ю, фотагалерэі, музычныя чарты, падкасты і шмат што іншае можна знайсці анлайн. Уся інфармацыя пададзеная на беларускай, рускай і англійскай мовах.