wd wp Пошук: ⬜

ФК Тарпеда Мінск

«Тарпеда» — беларускі футбольны клуб з горада Мінск, заснаваны ў 1947 годзе. У 1992—2004 і 2018—2019 гадах выступаў у Вышэйшай лізе чэмпіянату Беларусі. У цяперашні час гуляе ў Другой лізе.

Гісторыя

У савецкія часы клуб гуляў у Чэмпіянаце БССР, пяць разоў аўтазаводцы атрымлівалі ў ім перамогу. З 1992 «Тарпеда» удзельнічала ў Вышэйшай лізе чэмпіянату Беларусі. Найбольшы поспех клуб меў у пачатку 2000-х, калі двойчы атрымаў чацвёртае месца.

У 2005 клуб з-за фінансавых цяжкасцей перайшоў у Другую лігу, у якой адразу перамог. Але адразу пасля гэтага «Тарпеда» спыніла сваё існаванне. База клуба была перададзена новаму клубу, які ўтварыўся на аснове мінскай «Змены» — ФК «Мінск». У 2007 клуб быў адроджаны аматарамі і заявіўся ў чэмпіянаце Мінска (чацвёрты ўзровень беларускіх ліг).

2014—2019

У лютым 2014 клуб атрымаў пасведчанне аб дзяржаўнай рэгістрацыі[1]. У красавіку 2014 «Тарпеда» папоўніла склад удзельнікаў Другой лігі[2]. У ліпені 2015 стала вядома аб пачатку супрацоўніцтва «Тарпеда» з расійскай кампаніяй «Мирком»[3]. Неўзабаве склад «Тарпеда» папоўніў шэраг моцных для ўзроўня Другой лігі ігракоў, і сталічная каманда здолела выйсці ў фінальны этап, апынуўшыся вышэй за аднаго з галоўных фаварытаў сезона пінскую «Хвалю». У фінальным этапе «Тарпеда» таксама выступала паспяхова і ўжо за два туры да фінішу гарантавала выхад у Першую лігу. Паражэнне ў апошнім туры, аднак, адкінула мінчан на выніковы трэці радок.

У Першай лізе каманда значна абнавіла склад, запрасіўшы ў склад у асноўным маладых ігракоў, якія не праходзілі ў склад клубаў Вышэйшай лігі. Галоўным трэнерам стаў Павел Бацюта. Аднак, каманда хутка апынулася ў канцы турнірнай табліцы, пасля чаго ўлетку галоўным трэнерам замест Бацюты стаў Андрэй Пышнік, а каманда папоўнілася шэрагам новых ігракоў. У выніку, «Тарпеда» здолела ўзняцца ў табліцы на 9-ы радок з 14.

У сезоне 2017 «Тарпеда» стала адным з галоўных прэтэндэнтаў на выхад у Вышэйшую лігу. Аднак, паражэнне ў апошнім туры ад «Промня» (0:2) пакінула тарпедаўцаў на трэцім месцы.

У сакавіку 2018 года, пасля таго як «Крумкачы» не былі дапушчаны да ліцэнзавання ў Вышэйшай лізе на сезон 2018, «Тарпеда» атрымала месца ў элітным дывізіёне. Каманда доўгі час ішла ўнізе табліцы, аднак за тур да фінішу забяспечыла месца ў Вышэйшай лізе на наступны сезон.

У сезоне 2019, пасля неблагога пачатку (перамога над «Іслаччу» і нічыя з «Віцебскам») справы ў каманды пайшлі горш, яна апынулася ў канцы табліцы. У маі 2019 года асноўны спонсар «Тарпеда», Міхаіл Міраненкаў, адмовіўся ад фінансавання каманды, і амаль два месяцы яна існавала без грошай. У ліпені футбалісты сталі масава пакідаць клуб, аднак дырэктар Андрэй Салангін намагаўся знайсці фінансаванне і магчымасць працягнуць выступаць у чэмпіянаце. У двух апошніх матчах (у Кубку Беларусі — 28 ліпеня супраць «Клецка» і 3 жніўня супраць БАТЭ), «Тарпеда» было прадстаўлена пераважна ігракамі моладзевага складу, з вопытных былі толькі капітан Сяргей Лынько і малдаўскі легіянер Яўген Аанча, які нядаўна папоўніў склад. Неўзабаве пасля паражэння ў Кубку ад БАТЭ, 6 жніўня, клуб афіцыйна абвясціў аб зняцці з чэмпіянату[4]. Паколькі «Тарпеда» правяло палову матчаў, то ў застаўшыся матчах яму было залічана тэхнічнае паражэнне 0:3.

Пасля 2019 года

У красавіку 2020 года «Тарпеда» планавала заявіцца ў Другую лігу[5], аднак не трапіла ў канчатковы спіс удзельнікаў[6]. Каманды «Тарпеда» працягвалі выступаць на аматарскім і юнацкім узроўнях.

У пачатку сезона 2021 года фан-рух клуба адмовіўся падтрымліваць клуб, пакуль у краіне працягваюцца палітычныя судовыя справы, збіццё і забойства людей за ўласныя меркаванні[7].

У сакавіку 2022 года «Тарпеда» далучылася да ліку ўдзельнікаў Другой лігі[8]. У дывізіёне горада Мінска каманда доўгі час ішла ўверсе табліцы, аднак у выніку саступіла асноўным канкурэнтам, заняла трэцяе месца і не здолела выйсці ў фінальны этап.

Папярэднія назвы

1947—1998: «Тарпеда»
1999—2002: «Тарпеда-МАЗ»
2003—2005: «Тарпеда-СКА»
з 2007: «Тарпеда»

Дасягненні

БССР

Пераможца Чэмпіянату БССР: 1947, 1962, 1966, 1967, 1969

Рэспубліка Беларусь

Пераможца Другой лігі чэмпіянату Беларусі: 2005
Фіналіст Кубка Беларусі: 1999/2000
Лепшае дасягненне ў Вышэйшай лізе — 4 месца (2002, 2003)
Пераможца аматарскага Кубка Мінска: 2008, 2009

Статыстыка выступленняў

Чэмпіянат і Кубак Беларусі

Сезон	Ліга	М	Г	В	Н	П	Галы	Ачкі	Кубак	Заўвагі
1992	Першая (Д1)	10	15	5	3	7	15–17	13	Чвэрцьфінал
1992/1993	Першая (Д1)	9	32	10	10	12	29–33	30	1/16 фіналу
1993/1994	Першая (Д1)	6	30	9	15	6	18–18	33	Чвэрцьфінал
1994/1995	Першая (Д1)	6	30	11	10	9	36–29	32	1/8 фіналу
1995	Першая (Д1)	9	15	5	3	7	12–27	18	1/16 фіналу
1996	Першая (Д1)	12	30	7	8	15	32–53	29	1/8 фіналу
1997	Першая (Д1)	8	30	12	6	12	45–43	42	1/8 фіналу
1998	Вышэйшая (Д1)	7	28	12	8	8	44–22	44	Паўфінал	Змена назваў ліг
1999	Вышэйшая (Д1)	10	30	10	5	15	31–47	35	Фіналіст
2000	Вышэйшая (Д1)	8	30	13	10	7	45–28	49	1/8 фіналу
2001	Вышэйшая (Д1)	8	26	10	7	9	31–32	37	1/8 фіналу
2002	Вышэйшая (Д1)	4	26	15	6	5	30–16	51	1/8 фіналу
2003	Вышэйшая (Д1)	4	30	19	7	4	54–20	64	1/16 фіналу
2004	Вышэйшая (Д1)	6	30	13	7	10	37–31	46	1/8 фіналу	Адмова і пераход у Другую лігу
2005	Другая (Д3)	1	26	22	4	0	75–9	70	1/32 фіналу	Выхад у Першую лігу
2006	Клуб спыніў існаванне
2007	Чэмпіянат Мінска (Д4)	5	20	8	3	9	37–42	27
2008	Чэмпіянат Мінска (Д4)	5	14	4	3	7	19–33	15
2009	Чэмпіянат Мінска (Д4)	3							1/32 фіналу
2010	Чэмпіянат Мінска (Д4)	4	18	10	2	6	35–17	32	1/32 фіналу
2011	Чэмпіянат Мінска (Д4)	1
2012	Чэмпіянат Мінска (Д4)	3	14	7	2	5	25–20	23
2013	Чэмпіянат Мінска (Д4)	9	22	7	4	11	36–38	25
2014	Другая — Б (Д3)	6	22	8	5	9	28–26	29	1/64 фіналу
2014	Матчы за 11 месца¹	12	2	0	2	0	4–4		1/64 фіналу
2015	Другая — Б (Д3)	4	18	10	4	4	27–13	34	1/32 фіналу	Выхад у фінальны этап
2015	Фінальны этап	3	14²	7	4	3	21–13	25	1/32 фіналу	Выхад у Першую лігу
2016	Першая (Д2)	9	26	9	6	11	35–36	33	1/16 фіналу
2017	Першая (Д2)	3	30	17	6	7	60–29	57	1/16 фіналу	Атрыманне месца ў Вышэйшай лізе
2018	Вышэйшая (Д1)	14	30	6	6	18	20–41	24	1/8 фіналу
2019	Вышэйшая (Д1)	16	30	1	3	26	4–63	6	1/8 фіналу	Зняцце з чэмпіянату³

2022	Другая — Мінск (Д3)	3	16	10	3	3	29–16	33	1/64 фіналу

1 Стыкавыя матчы супраць клуба «Асіповічы», які заняў 6 месца ў групе А (1:1, 3:3 — паражэнне па меншай колькасці гасцявых галоў).
2 Улічваючы 6 гульняў, перанесеных з 1-га раўнда. Паказчыкі ўласна ў фінальным этапе: 8 матчаў, 5—2—1, розніца мячоў 17—7.
3 «Тарпеда» знялося з чэмпіянату пасля 15 праведзеных матчаў, у застаўшыхся гульнях былі залічаны тэхнічныя паражэнні з лікам 0:3.

Галоўныя трэнеры

Уладзімір Касакоўскі (1992 — люты 1997)
Анатоль Юрэвіч (люты 1997 — кастрычнік 2001)
Сяргей Францаў (кастрычнік 2001 — ліпень 2002)
Сяргей Бароўскі (ліпень 2002 — чэрвень 2003)
Аляксандр Башмакоў (чэрвень 2003 — ліпень 2004)
Сяргей Падпалы (ліпень — снежань 2004)
Леанід Савіцкі (2005)
Мікалай Бранфілаў (2014 — 2015)
Павел Бацюта (сакавік — чэрвень 2016)
Андрэй Пышнік (чэрвень 2016 — снежань 2017)
Сяргей Кабельскі (студзень — чэрвень 2018)
Леанід Лагун (чэрвень — жнівень 2018)
Уладзімір Нявінскі (жнівень 2018 — жнівень 2019)

Зноскі

Тэмы гэтай старонкі (6):
Футбольныя клубы Беларусі
Вікіпедыя:Артыкулы з пераазначэннем значэння з Вікідадзеных
Футбольныя клубы, заснаваныя ў 1947 годзе
Футбольныя клубы паводле алфавіта
1947 год у Мінску
ФК Тарпеда Мінск