Нацыянальны Сход Рэспублікі Беларусь чацвертага склікання — беларускі парламент, абраны на парламенцкіх выбарах 28 верасня 2008 года.
У парламент перайшлі 30 дэпутатаў папярэдняга склікання. З 110 дэпутатаў ніжняй палаты 103 — беспартыйныя. У парламент абраныя шэсць прадстаўнікоў КПБ на чале з лідарам партыі Таццянай Голубевай і старшыня Аграрнай партыі Міхаіл Русы.
У Палаце прадстаўнікоў на прафесійнай аснове будуць працаваць больш за 20 прадстаўнікоў прамысловасці, АПК, жыллёва-камунальнай гаспадаркі. У парламент абраныя каля 30 прадстаўнікоў выканаўчае галіны рознага ўзроўню, у тым ліку, старшыня Віцебскага аблвыканкама Уладзімір Андрэйчанка, намеснік старшыні адміністрацыі прэзідэнта Аляксандр Папкоў, кіраўнікі раённых і гарадскіх выканаўчых камітэтаў. У парламент абраныя 10 дэпутатаў, якія працавалі да гэтага ў сферы адукацыі, 9 парламентараў працавалі ва ўстановах аховы здароўя, двое — у сістэме судовай улады.
У новым складзе Палаты прадстаўнікоў будуць працаваць 12 дэпутатаў пенсійнага веку, яшчэ 42 парламентары дасягнуць гэтага веку за час чатырохгадовага знаходжання ў Палаце прадстаўнікоў. Старэйшымі паводле веку сярод абраных дэпутатаў ёсць Пётр Южык, які працаваў намеснікам старшыні Віцебскага аблвыканкама, і Георгій Дашкевіч, былы галоўны дараднік старшыні Гомельскага аблвыканкама. Яны абодва нарадзіліся ў 1946 годзе. Самым маладым дэпутатам стала першы сакратар Слуцкага гарадскога камітэта грамадскага аб’яднання «Беларускі рэспубліканскі саюз моладзі» Інеса Кляшчук, якая нарадзілася ў 1978 годзе. Таксама ў парламент абраныя 35 жанчын.