Мараўскасілезскі край
Мараўскасілезскі край (чэшск.: Moravskoslezský kraj) — адміністрацыйная адзінка Чэхіі, размешчаны на паўночным усходзе гістарычнай вобласці Маравія і поўдні Сілезіі. Адміністрацыйны цэнтр края — горад Острава. Да 2001 года называўся Остраўскім краем.
Геаграфічнае становішча
На поўначы і паўночным усходзе край мяжуе з Польшчай, на паўднёвым усходзе — са Славакіяй, далей па гадзіннікавай стрэлцы — з Оламаўцкім і Злінскім краямі Чэхіі.
Мараўскасілезскі край мае неаднастайны рэльеф. На поўначы знаходзяцца горныя масівы Высокі Есенік (Hrubý Jeseník) з самай высокай гарой Маравіі Прадзед (Praděd) вышынёй 1491 метраў над узроўнем мора, якія пераходзяць у ніжэйшыя перадгор’і. У цэнтры рэгіёна размешчана шчыльна заселеная раўніна. На паўднёвым усходзе ландшафт ізноў становіцца гарыстым. Плошча края складае 5527 квадратных кіламетраў (7 % плошчы тэрыторыі Чэхіі). Больш за палову тэрыторыі займаюць сельскагаспадарчыя ўгоддзі, 35 % — лясістая мясцовасць. Край багаты на розныя віды карысных выкапняў: каменны вугаль, прыродны газ, вапняк, граніт, мармур, сланец, гіпс, пясок, будаўнічая гліна.
Адміністрацыйны падзел
Край падзелены на 6 раёнаў:
| Раён | Плошча, км² |
Насельніцтва,[1] чал. (2011) |
Колькасць населеных пунктаў |
|---|---|---|---|
| Брунталь | 1536,06 | 92 693 | 67 |
| Карвіна | 356,24 | 256 394 | 17 |
| Нові-Йічын | 881,59 | 148 074 | 54 |
| Опава | 1113,11 | 174 899 | 77 |
| Острава-горад | 331,53 | 326 018 | 13 |
| Фрыдак-Містак | 1208,49 | 207 756 | 72 |
Насельніцтва
Насельніцтва края складае 1 205 834 жыхароў (2011). Гэта самы густанаселены рэгіён Чэхіі. Шчыльнасць насельніцтва амаль удвая большая, чым у іншых рэгіёнах краіны. 23 % жыхароў жыве ў гарадах з насельніцтвам звыш 5000 чалавек і 60 % — у гарадах з насельніцтвам звыш 20 000 жыхароў.
Гарады
Найбольш буйныя гарады края (станам на 2005 год): Острава (310 078 жыхароў), Гавіржаў (84 427 жыхароў), Карвіна (65 385 жыхароў), Фрыдак-Містак (59 682 чалавека), Опава (59 426 чалавек).
- Білавец
- Богумін
- Брунталь
- Чэскі-Цешын
- Фрэнштат-пад-Радгаштам
- Фрыдак-Містак
- Фрыдлант-над-Остравіцы
- Гавіржаў
- Глучын
- Яблункаў
- Карвіна
- Копршыўніцы
- Краваржы
- Крноў
- Нові-Йічын
- Одры
- Опава
- Орлава
- Острава
- Рымаржаў
- Тршынец
- Віткаў
- Врбно-пад-Прадзедам
Эканоміка і транспарт
Ужо ў часы Аўстра-Венгрыі ў XIX стагоддзі край з’яўляўся адным з найбольш прамыслова развітых рэгіёнаў цэнтральнай Еўропы.
Напачатку XXI стагоддзя край займае другое месца ў Чэхіі (пасля Прагі) па ўзроўні вытворчасці — на долю рэгіёна даводзіцца 10,4 % валавага нацыянальнага прадукта. Усе прадпрыемствы па выплаўленні чыгуну і 92 % вытворчасці сталі ў Чэхіі засяроджаны ў Мараўскасілезскім краі. Здабыча каменнага вуглю таксама ажыццяўляецца ў гэтым рэгіёне. Іншыя важныя галіны эканомікі краю акрамя цяжкай прамысловасці — гэта энергетыка, здабыча газу, вытворчасць грузавых аўтамабіляў, а таксама харчовая прамысловасць. У краі маюцца 23 прамысловыя зоны. У 2006 годзе на тэрыторыі края ажыццяўлялі дзейнасць там 5536 замежных фірмаў, найбольшую вага сярод якіх маюць прамысловыя кампаніі са Славакіі (24,8 %), Польшчы (18,5 %) і Германіі (14,5 %).[2]
З мэтай развіцця турызму і эканамічнага супрацоўніцтва ў краі ўтвораны 4 еўрарэгіёны Бескіды (Beskydy), Прадзед (Praded), Сілезія (Silesia) і Цешынская Сілезія (Těšínské Slezsko).
У рэгіёне адсутнічаюць буйныя аўтамагістралі. Да заканчэння будаўніцтва трасы D 47 рух аўтатранспарту ажыццяўляецца па магістралях Опава — Острава — Чэскі-Цешын — Мосты-ў-Яблункава і Нові-Йічын — Фрыдак-Містак — Чэскі-Цешын. У рэгіёне маецца сучасная чыгуначная сетка. Зблізку ад горада Мошнаў размешчаны міжнародны аэрапорт Острава-Мошнаў (Ostrava-Mošnov).
Турызм
На поўначы края развіты турызм, у тым ліку звязаны з зімовымі відамі спорту.
Таксама ў краі шмат гістарычных помнікаў, якія прывабліваюць турыстаў. Гэта гістарычныя цэнтры гарадоў Пржыбар, Нові-Йічын і Штрамберк, замкі Градзец-над-Моравіцы, Радунь, Краваржычы, Стары-Йічын, Совінец.
Культура
У краі налічваецца 19 тэатраў, 63 музея, 99 галерэй мастацтва. Культурным цэнтрам рэгіёна з’яўляецца горад Острава, у якім маецца сімфанічны аркестр і некалькі тэатраў. У рэгіёне дзейнічаюць тэхнічныя музеі: аўтамабільнай прамысловасці ў Копржыўніцах і горназдабыўной прамысловасці ў Остраве-Петржкавіцах.
Гл. таксама
Зноскі
- ↑ Перапіс насельніцтва Чэхіі (2011)
- ↑ http://o-kraji.kr-moravskoslezsky.cz/cz/zakladni-informace/statisticke-informace/default.aspx Архівавана 8 чэрвеня 2008.
Спасылкі
- Афіцыйны сайт адміністрацыі края
- Сайт края — на рускай мове Архівавана 27 лютага 2015.
- Прэзентацыя Мараўскасілезскага края як прывабнага турыстычнага рэгіёна Архівавана 20 кастрычніка 2010. Архівавана 20 кастрычніка 2010. (чэшск.) , (руск.) , (англ.) , (ням.) , (польск.)
Катэгорыя·Вікіпедыя·Артыкулы з пераазначэннем значэння з Вікідадзеных
Category:%D0%A1%D1%82%D0%B0%D1%80%D0%BE%D0%BD%D0%BA%D1%96 %D0%B7 %D0%BA%D0%B0%D1%80%D1%82%D0%B0%D0%BC%D1%96
Катэгорыя·Мараўскасілезскі край
Катэгорыя·Старонкі з нелікавымі аргументамі formatnum