Тацця́на Ві́ктараўна Шапу́цька (нар. 25 верасня 1990; Мінск, БССР, СССР) — беларуская партыйная дзяячка, прэс-сакратар «Маладога Фронту» ў перыяд 2007—2010 гг. З 2011 г. працуе ў незалежнай прэсе, уласны карэспандэнт газеты «Новы час»; аўтарка часопіса «Ідэя».
Нарадзілася 25 верасня 1990 года ў Мінску. Скончыла гімназію №1 імя Францыска Скарыны з паглыбленым вывучэннем англійскай мовы. У 2008 годзе паступіла на юрыдычны факультэт БДУ, спецыяльнасць — «паліталогія». У 2009 г. па палітычных матывах была адлічана з БДУ[1] і прынятая ў лік студэнтаў Еўрапейскага гуманітарнага ўніверсітэта (Літва). У 2014 г. атрымала ступень бакалаўра палітычных навук, у дадзены момант з’яўляецца магістрантам ЕГУ па праграме «Публічная палітыка».
З сакавіка 2007 года з’яўляецца членам «Маладога Фронту». Са жніўня 2007 года — прэс-сакратар «Маладога Фронту».
Удзельнічала ў многіх акцыях і кампаніях «Маладога Фронту», неаднаразова затрымлівалася. 7 лістапада 2008 года за ўдзел у антыкамуністычным пікеце ля КДБ была арыштавана на 3 сутак[2]. 3 жніўня 2011 г. была асуджана на 10 сутак арышту за асвятленне пікета ў падтрымку зняволенага лідара «Маладога Фронту» Змітра Дашкевіча ў Горках (Магілёўская вобласць)[3].
Двойчы станавілася лаўрэатам прэміі Беларускай асацыяцыі журналістаў «Вольнае слова»[4][5].
13 жніўня 2010 года ў Фарным касцёле Божага Цела ў Нясвіжы (Мінская вобласць) абвянчалася з Глебам Лабадзенкам. Сведкамі выступілі журналіст «Звязды» Яўген Валошын і намесніца старшыні «Маладога Фронту» Наста Палажанка. Спецыяльнымі гасцямі былі княгіня Эльжбета Радзівіл, спевакі Лявон Вольскі і Кася Камоцкая[6]. У шлюбе мае двух сыноў.