Гаро́шак панонскі[3] (Vicia pannonica) — кветкавая расліна роду Гарошак (Vicia) сямейства Бабовыя (Fabaceae).
Аднагадовая травяністая расліна[3][4]. Маюцца азімая і яравыя формы[4]. Сцябло ўзыходнае. Лісце чаргаванае па даўжыні сцябла, з дробнымі прылісткамі даўжынёй 3—4[4] мм і складаецца з 6—9 пар лісткоў. Галоўная вось ліста заканчваецца вусікам. Лісткі лінейныя або падоўжаныя, 12—20[4] мм у даўжыню, з гладкім краем, апушаныя. Кветкі з пяццю пялёсткамі[5], па 2—4 у пучках на кароткіх ножках. Вяночак да 22[4] мм у даўжыню, жоўтага колеру, больш светлы ў ніжняй частцы. Плод — паніклы, падоўжаны, апушаны, звужаны да канцоў струк. Насенне амаль шарападобнай формы, крыху граністае[4].
Расліна распаўсюджана на тэрыторыі Еўропы, умераных абласцей Заходняй Азіі (Кіпр, Іран, Турцыя) і на Каўказе[6]. Натуралізавалася ў іншых рэгіёнах[6].
Святлолюбівая, ценевынослівая расліна[5]. Мезафіт і эўтроф[5]. Устойлівая да засухі і зімаўстойлівая расліна[4]. Расце на лугах, узлесках і палянах, у стэпах, парках, садах і агародах, на аблогах, пустках, каля дарог. Цвіце ў чэрвені—ліпені[4]. Плады паспяваюць у ліпені—жніўні[4].
Каштоўная кармавая расліна[4]. Па якасці не саступае люцэрне і канюшыне. У сене маецца да 21,4 , у насенні да 26,7 % бялкоў[3].