У Вікіпедыі ёсць артыкулы пра іншых асоб з прозвішчам Бучынская. Наталля Любаміраўна Бучынская (укр.: Ната́лія Любоми́рівна Бучи́нська; нар. 28 красавіка 1977, Львоў) — украінская спявачка
, рэжысёр, Народная артыстка Украіны (2004).
Бацька працаваў стаматолагам, а маці — таваразнаўцам. Яны любілі спяваць, што адыграла значную ролю ў выбары будучай прафесіі. Першымі слухачамі яе спеваў былі госці бацькоў, яе сябры і знаёмыя. Калі дзяўчыне споўнілася пяць гадоў, сям’я пераязджае жыць у Цярнопаль. У школе ўдзельнічала ў школьным хоры. Маючы трохразовыя рэпетыцыі кожны тыдзень, яна аж да 11 класа заставалася нязменнай удзельніцай творчага калектыву, разам з якім выступала на сцэне Цярнопальскага дома культуры «Бэрэзіль». Скончыла Цярнопальскую гімназію імя Івана Франка і музычную школу. Пасля паступае ў Цярнопальскую акадэмію народнай гаспадаркі на спецыяльнасць «Рэвізія і кантроль». У 2005 г. скончыла Кіеўскі нацыянальны ўніверсітэт культуры і мастацтваў па кірунку «Рэжысура». У 2001 г. выйшла замуж за вайскоўца Аляксандра Якушава, у 2002 г. нарадзіла дачку Кацярыну. Як салістцы ансамбля ёй прысвоена спецыяльнае званне прапаршчыка ўнутранай службы. У 2004 г. скончыла Кіеўскую акадэмію ўнутраных спраў у званні маёра міліцыі.
Ужо з першага курса навучання ў вну Наталля прымае ўдзел у песенных конкурсах і фестывалях. У 1995 г. атрымлівае сваю першую перамогу ў конкурсе «Міс акадэмія». 18 лютага 1995 г. перамагае на фестывалі «Чэрвона рута». Юная спявачка бярэ ўдзел у фестывалях «Маладая Галічына», «Співаначка-джазачка» (Наваявораўск), «Песня будзе сярод нас» (Трускавец), «Мелодыя», «На хвалях Свіцязя», «Пярліны сезона», «Лёс», і становіцца лаўрэатам конкурсу «Песня года» (1995—1998 гг.). У 1998 г. прыязджае ў Кіеў па запрашэнні Дзяржаўнага ансамбля песні і танца Міністэрства ўнутраных спраў Украіны, праходзіць праслухоўванне і становіцца салісткай. Менавіта тады і сустракае свайго будучага дырэктара Леаніда Радчанку, які стаў не толькі яе творчым настаўнікам, але і сябрам па жыцці. У тым жа годзе яе песня «Паслухай, шэлесцяць дажджы» стала «Песняй года». Прымала ўдзел у «Песенным вернісажы» (1998—2002 гг.), ездзіла з вялікай канцэртнай праграмай у Косава. Стала самай маладой народнай артысткай Украіны. Дала больш за 800 канцэртаў. У яе рэпертуары больш за 160 песень. Спявачка выконвае песні на ўкраінскай, рускай, армянскай, англійскай і французскай мовах. Аўтарамі песень з’яўляюцца, у прыватнасці, Мікола Петраш, Юрый Рыбчынскі, Руслан Квінта, Уладзімір Мацецкі інш.