Міхаіл Маркавіч Мядзель (17 кастрычніка 1910, в. Задзежжа — 21 студзеня 1981) — капітан Савецкай Арміі, удзельнік Вялікай Айчыннай вайны, Герой Савецкага Саюза (1943).
Нарадзіўся 17 кастрычніка 1910 года ў вёсцы Задзежжа (цяпер — Верхнядзвінскі раён Віцебскай вобласці Беларусі). Пасля заканчэння сямі класаў школы пражываў у Солнечнагорскім раёне Маскоўскай вобласці, працаваў загадчыкам гаспадаркі на птушкафабрыцы. У 1936 годзе скончыў курсы прапагандыстаў. У чэрвені 1941 года быў прызваны на службу ў Рабоча-сялянскую Чырвоную Армію і накіраваны на фронт Вялікай Айчыннай вайны. За час вайны тры разы быў паранены[1].
Да верасня 1943 старшы лейтэнант Міхаіл Мядзель быў парторгам батальёна 1031-га стралковага палка 280-й стралковай дывізіі 60-й арміі Цэнтральнага фронту. Вызначыўся падчас бітвы за Дняпро. 25 верасня 1943 года Мядзель на чале перадавога атрада пераправіўся праз Дняпро ў раёне вёскі Акунінава Казэлецкага раена Чарнігаўскай вобласці і прыняў актыўны ўдзел у баях за захоп і ўтрыманне плацдарма на яго заходнім беразе, раптоўным ударам адкінуўшы праціўніка[1].
Указам Прэзідыума Вярхоўнага Савета СССР ад 17 кастрычніка 1943 года за «ўзорнае выкананне баявых заданняў камандавання на фронце барацьбы з нямецкімі захопнікамі і праяўленыя пры гэтым мужнасць і гераізм» старшы лейтэнант Міхаіл Мядзель быў удастоены высокага звання Героя Савецкага Саюза з уручэннем ордэна Леніна і медалі «Залатая Зорка» за нумарам 2233[1].
Удзельнічаў у баях савецка-японскай вайны. У 1946 годзе ў званні капітана Мядзель быў звольнены ў запас. Вярнуўся да працы на птушкафабрыцы. Памёр 21 студзеня 1981 года, пахаваны ў Маскве на Галавінскіх могілках[1].
Быў таксама узнагароджаны двума ордэнамі Чырвонай Зоркі[1].