Герой Савецкага Саюза — вышэйшая ступень адрознення СССР, ганаровае званне, якога ўдастойвалі за здзяйсненне подзвігу ці выдатных заслуг падчас баявых дзеянняў, а таксама, у якасці выключэння, і ў мірны час.
Званне ўпершыню ўстаноўлена Пастановай ЦВК СССР ад 16 красавіка 1934, дадатковы знак узнагароды для Героя Савецкага Саюза — медаль «Залатая Зорка» — заснаваны Указам Прэзідыума Вярхоўнага Савета СССР ад 1 жніўня 1939. У адпаведнасці з Указам Прэзідыума Вярхоўнага Савета СССР ад 14 мая 1973 разам з медалём «Залатая Зорка» герою ўручаліся таксама ордэн Леніна (вышэйшая ўзнагарода СССР) і грамата Прэзідыума Вярхоўнага Савета СССР.