Міжрэгіянальная акадэмія кіравання персаналам — недзяржаўная вышэйшая навучальная ўстанова ва Украіне.
Акадэмія ўтворана ў 1989 годзе як недзяржаўная вышэйшая навучальная і навукова-даследчая ўстанова, якая прафесійна займаецца праблемамі менеджменту і бізнесу. Заснавальнік, першы рэктар і прэзідэнт акадэміі — Георгій Васільевіч Шчокін. У акадэміі вучацца студэнты з 39 краін свету па 20 спецыяльнасцях і 109 спецыялізацыях. Акадэмія ўключае Прэзідэнцкі ўніверсітэт у Кіеве, Усеўкраінскі ўніверсітэт (больш за 40 інстытутаў, філіялаў, даччыных структур ва ўсіх рэгіёнах Украіны) і Міжнародны адкрыты ўніверсітэт (Інстытут міжнароднай адукацыі ў Кіеве і сетка цэнтраў за мяжой). Навучальны працэс забяспечваюць больш за 2300 выкладчыкаў, 70 % з якіх — дактары і кандыдаты навук. Акадэмія мае ліцэнзію Міністэрства адукацыі і навукі Украіны, у тым ліку на наданне адукацыйных паслуг замежным грамадзянам, і акрэдытаваная па IV (вышэйшаму) ўзроўню па ўсіх спецыяльнасцях і выдае дыпломы дзяржаўнага ўзору. Акадэмія не раз трапляла ў гучныя скандалы, звязаныя з антыўкраінскімі і ксенафобскімі выказваннямі выкладчыкаў, антысемітызмам і адмаўленнем Халакосту, неналежнай якасцю падрыхтоўкі спецыялістаў і інш.