Бу́сельнік цыкутавы[3], Бусельнік цыкутовы[4], Бусельнік звычайны (Erodium cicutarium) — від кветкавых раслін роду Бусельнік (Erodium) сямейства Гераніевыя (Geraniaceae).
Грабелькі, дажджоўнік[5], жабнік[6], грабенчыкі, сушчэннік, чарвівец[3][4][7][8].
Аднагадовая травяністая расліна вышынёй 10—50 см. Сцябло прамастаячае або прыўзнятае, апушанае густымі валаскамі. Лісце двойчыперыстарассечанае. Сцябловае на чаранках, супраціўнае[3]. Прыкаранёвае лісце ў разетцы. Кветкі малінавага, бледна-пурпуровага колеру з цёмнымі жылкамі, сабраныя па 3—8 у парасонападобныя суквецці[3]. Плод — зборны арэшак[3].
Расліна распаўсюджана на тэрыторыі Еўразіі. Заносны від у Аўстраліі і Паўночнай Амерыцы[9]. Расце на палях, адкрытых сухіх месцах, у садах і агародах, у стэпах, пустынях і перадгор’ях, на засмечаных месцах. Цвіце ў маі—верасні[3].
Лекавая і меданосная расліна. Утрымлівае дубільныя рэчывы, карацін, арганічныя кіслоты і смолы[3]. Пустазелле на пасевах збожжавых, прапашных культур і льну, у садах і вінаградніках[9].