wd wp Пошук:

Стары Жадзен

Стары Жадзен — рэспубліканскі водна-балотны заказнік, які змяшчаецца на поўдні Жыткавіцкага раёна Гомельскай вобласці.

Стары Жадзен з’яўляецца ТВП міжнароднай значнасці. ТВП-утвараючы від — вялікі арлец (Aquila clanga)[1].

Апісанне

Леса-балотны комплекс, ядро якога складаюць балоты Стары Жадзен і Вялікае, раздзеленыя паміж сабой пакатай градой. Найбольш характэрнымі ландшафтамі тут з’яўляюцца верхавыя і пераходныя балоты, а таксама хваёвыя лясы[2].

Лясная расліннасць прадстаўлена шырокім спектрам супольніцтваў ад лішайнікавых хвойнікаў на старажытных эолавых дзюнах да чарнічных бярэзнікаў па іх падножжах і касачовых ольсаў па міжградавых паніжэннях[2].

Флора

Сярод рэдкіх раслін на тэрыторыі заказніка можна назваць такія віды, як асака прамая (Carex elata) і валасістаплодная (Carex lasiocarpa), рададэндран жоўты (Rhododendron luteum), плюшчай малы (Sparganium minor), танканог вялікі (Koeleria grandis), маннік складчаты (Glyceria plicata), вярба чарнічная (Salix myrtilloides), вярба лапландская (Salix lapponum), плывунец малы (Utricularia minor), плывунец прамежкавы (Utricularia intermedia), асака балоталюбівая (Carex heleonastes), сон лугавы (Pulsatilla pratensis), фіялка багнавая (Viola uliginosa), журавіны дробнаплодныя (Oxyccocus microcarpus) і іншыя[2].

Фаўна

Арнітафаўна

На ТВП адзначана 12 відаў птушак, занесеных у Чырвоную кнігу Рэспублікі Беларусь. Тэрыторыя мае значэнне для захавання некалькіх пар вялікага арляца (Aquila clanga). Акрамя таго тут адзначаны яшчэ некалькі глабальна пагражаемых відаў, у тым ліку грыцук вялікі (Limosa limosa) і вялікі кулон (Numenius arquata)[2].

Рукакрылыя

У 2015 годзе на тэрыторыі заказніка былі знойдзены некалькі цяжарных самак гіганцкай вячэрніцы (Nyctalus lasiopterus). Раней гэтыя лятучыя мышы адзначаліся ў Беларусі толькі ў 1930 годзе[3]. Акрамя гэтага ў Старым Жадзене пражываюць яшчэ 9 відаў рукакрылых, у тым ліку еўрапейская шыракавушка (Barbastella barbastellus), начніца Натэрэра (Myotis nattereri), кажанок паўночны (Eptesicus nilssonii) і начніца Бранта (Myotis brandtii)[3].

Іншыя

Сярод іншых відаў жывёл варта адзначыць такіх, як бабёр еўрапейскі (Castor fiber), выдра (Lutra lutra), соня лясная (Dryomis nitedula), рысь звычайная (Lynx lynx), трытон грабеньчаты (Triturus cristatus), балотная чарапаха еўрапейская (Emys orbicularis), мядзянка (Coronella austriaca)[2].

Зноскі

  1. Стары Жадзен
  2. 1 2 3 4 5 Стары Жадзен
  3. 1 2 Возвращение гигантской вечерницы: летучую мышь нашли в Беларуси через 85 лет Архівавана 10 верасня 2015. (руск.)

Літаратура

Спасылкі

Тэмы гэтай старонкі (4):
Катэгорыя·Жыткавіцкі раён
Катэгорыя·Заказнікі Беларусі
Катэгорыя·Водна-балотныя ўгоддзі Беларусі
Катэгорыя·Тэрыторыі, важныя для птушак