Бо́брскі сельсавет — адміністрацыйна-тэрытарыяльная адзінка ў складзе Крупскага раёна Мінскай вобласці Беларусі. Цэнтр — гарадскі пасёлак Бобр.
Утвораны 20 жніўня 1924 года ў складзе Крупскага раёна Барысаўскай акругі БССР. Цэнтр — мястэчка Бобр. З 9 чэрвеня 1927 года ў складзе Менскай акругі, з 18 чэрвеня 1927 года — у складзе Аршанскай акругі. Пасля скасавання акруговай сістэмы 26 ліпеня 1930 года ў Крупскім раёне БССР, з 20 лютага 1938 года — Мінскай вобласці. 27 верасня 1938 года статус Бабра паніжаны да вёскі. 17 лютага 1941 года Бобр атрымаў статус гарадскога пасёлка. 16 ліпеня 1954 года да сельсавета далучана тэрыторыя скасаванага Сакаловіцкага сельсавета[1]. 5 мая 1962 года да сельсавета далучана частка скасаванага Шэйкаўскага сельсавета (9 населеных пунктаў: Віктоліна, Кляновічы, Ліпавец, Мярэцкі Двор, Навасёлкі, Сінічанка, Стаі, Туманова і Шацькі)[2]. 28 ліпеня 1966 года ў склад сельсавета з Акцябрскага сельсавета перададзены 10 населеных пунктаў (Журавы, Кутавец, Луцішча, Прудзіны, Слабада, Смародзінка, Шарнева, Шкорнеўка, пасёлкі Кірава і Шарнева)[3]. 31 сакавіка 1977 года сельсавет скасаваны, яго тэрыторыя перададзена ў адміністрацыйнае падпарадкаванне Бобрскага пассавета (31 населены пункт: вёскі Альшанікі, Баравец, Віктоліна, Восава, Вялікі Лес, Дворышча, Доўгае, Еленка, Забалоцкае, Замкі, Кляновічы, Колас, Красноўка, Куты, Ліпавец, Ліцвінка, Мачулішча, Мярэцкі Двор, Навасёлкі, Навесы, Падсосенка, Пліса, Сакалавічы, Сінічанка, Скакоўка, Стаі, Стары Бобр, Туманова, Чарняўка, Шацькі і Ярашоўка) і ў склад Абчугскага сельсавета (13 населеных пунктаў: вёскі Журавы, Калыбанава, Кастрычнік, Кутавец, Ламское, Луцішча, Прудзіны, Слабада, Смародзінка, Шарнева, Шкорнеўка, пасёлкі Кірава і Шарнева)[4].
13 сакавіка 2008 года цэнтр Бобрскага пассавета перанесены з гарадскога пасёлка Бобр у аграгарадок Замкі[5].
16 снежня 2009 года Бобрскі пассавет рэарганізаваны ў Бобрскі сельсавет[6]. 31 снежня 2013 года цэнтр сельсавета перанесены ў гарадскі пасёлак Бобр[7].
Насельніцтва пассавета паводле перапісу 2009 года (30 населеных пунктаў, без гарадскога пасёлка Бобр) — 1468 чалавек[8], з іх 92,4 % — беларусы, 5,3 % — рускія, 1,1 % — украінцы[9].