У Вікіпедыі ёсць артыкулы пра іншых асоб з прозвішчам Браўн.
Аляксандр Карл Генрых Браўн (ням.: Alexander Carl Heinrich Braun[4] або ням.: Alexander Karl Heinrich Braun[4], або ням.: Alexander Braun[5], 10 мая 1805, г.Рэгенсбург, Германія — 29 сакавіка 1877) — нямецкі батанік, біёлаг, міколаг і палеантолаг.
Вучыўся ў Гайдэльбергу (1824—1831) і Парыжы (1831—1832).
Прафесар Політэхнічнай школы ў Карлсруэ (1833—1846), прафесар і дырэктар Батанічнага саду ў Фрэйбургскім універсітэце (1846—1851), з 1851 года — у Берліне.
У 1869 годзе Браўн быў адным з заснавальнікаў Берлінскага таварыства антрапалогіі, этналогіі і гісторыі першабытнага грамадства.
Член Германскай акадэміі «Леапальдзіна», Парыжскай АН.
Аляксандр Браўн памёр у Берліне 29 сакавіка 1877 года.
Браўн спецыялізаваўся на папарацепадобных, мохападобных, водарасцях, насенных раслінах, на акамянеласцях і на мікалогіі[4].
Аўтар навуковых прац па вывучэнні будовы і развіцця прэснаводных зялёных водарасцей, папарацепадобных; даследаваў партэнагенез і поліэмбрыянію ў раслін.
Прыхільнік параўнальнага і антагенетычнага кірункаў у марфалогіі. На падставе марфалагічных прыкмет прапанаваў сваю філагенетычную сістэму, якая легла ў аснову сістэм нямецкіх вучоных А.Эйхлера і А.Энглера.
Дэкаратыўная расліна Polystichum braunii была названа ў гонар Аляксандра Браўна.[6]