Чы́на гла́дкая, Сачавічнік гладкі[3] (Lathyrus laevigatus) — кветкавая расліна з роду Чына (Lathyrus) сямейства Бабовыя (Fabaceae).
Шматгадовая травяністая расліна вышынёй да 70 см з паўзучым карэнішчам чорна-бурага колеру. Сцябло прамое, голае ў ніжняй частцы і разгалінаванае ў верхняй. Лісце складанае, з 3—6 пар ланцэтных, эліптычных або падоўжана-яйкападобных лісткоў. Кветкі паніклыя, залаціста-жоўтага колеру. Плод — боб.
З’яўляецца эндэмікам флоры Еўропы, рэліктавы від на ўсходняй мяжы арэала. Пераважна распаўсюджаны ў Альпах, Пірэнеях, Апенінах, Карпатах і на Балканах[4]. Расце ў асветленых месцах у вільготных лясах, зарасніках арэшніку і шэрай вольхі. Цвіце ў красавіку—чэрвені. Размнажаецца насеннем і вегетатыўна (карэнішчам).
Від занесены ў Чырвоныя кнігі Беларусі (III катэгорыя[5]), Літвы, Расіі (Леніградскай, Пскоўскай і Цвярской абласцей[6]), Украіны.