Пылю́шнік смярдзючы[3] (Thalictrum foetidum) — від кветкавых раслін роду Пылюшнік (Thalictrum) сямейства Казяльцовыя (Ranunculaceae).
Шматгадовая травяністая расліна вышынёй 20—70[3] см з кароткім паўзучым карэнішчам. Сцябло прамастойнае, апушанае. Лісце чаргаванае і ў прыкаранёвай разетцы, тройчы-чатырохраздзельнае. Лісцікі круглаватыя, трохзубчастыя. Кветкі шматлікія, чырванавата-бурыя з чатырма пялёсткамі. Тычынкі павіслыя, фіялетава-жоўтыя. Суквецце — рыхлыя мяцёлка. Плод — шматарэшак.
Расліна ядавітая[4].
Расліна распаўсюджана на тэрыторыі Еўропы, умераных і трапічных (Бутан, Індыя, Пакістан, Непал) абласцей Азіі[5]. Святлолюбівая і ценевынослівая расліна[4]. Ксерафіт, мезафіт, мезатроф[4].
Расце ў горных стэпах і на горных лугах, узлесках, у хмызняках. Цвіце ў чэрвені—ліпені[3].
Ахоўваецца на тэрыторыі Малдовы, Данецкай, Запарожскай і Хмяльніцкай абласцей Украіны, Амурскай і Цюменскай абласцей Расіі[4].
Лекавая расліна.