У Вікіпедыі ёсць артыкулы пра іншых асоб з прозвішчам Барысюк.
Таццяна Барысюк (18 кастрычніка 1971, Мінск) — беларуская паэтка, крытык, літаратуразнаўца, перакладчыца і празаік. Вядучая шэрагу паэтычна-музычных вечарын «Таццянін дзень» і вечарыны «Містыка лічбаў» у паэтычным тэатры Арт.С[1][2]. Навуковы супрацоўнік аддзела ўзаемасувязей літаратур у «Цэнтры даследаванняў беларускай культуры, мовы і літаратуры НАН Беларусі».
Паходзіць з творчай сям’і, з’яўляецца дачкой беларускага рускамоўнага паэта Пятра Пятровіча Барысюка (1938—2001)
Навучалася ў мінскіх школах № 138, 149. З 1986 па 1990 гг. вучылася ў мінскім педвучылішчы № 1. У 1995 г. скончыла філфак БДУ.
У 2001 г. скончыла аспірантуру Інстытута літаратуры імя Янкі Купалы НАН Беларусі, дзе цяпер працуе малодшым навуковым супрацоўнікам у аддзеле ўзаемасувязей літаратур[3].
З 2004 г. сябра Саюза беларускіх пісьменнікаў[3].
З 2004 па 2007 г. вучылася ў Беларускім Калегіюме на аддзяленні філасофіі і літаратуры. З 2003 г. — сябра суполкі «Літаратурны квартал» (заснавана пры газ. «Літаратура і мастацтва»; з 2004 г. — «Літаратурнае прадмесце»). Удзельніца Паэтычнага тэатра «Арт. С». З 2018 года — сябра літаратурнага клуба «Экватар».
Дэбютавала як паэт і крытык 1993 г. у часопісе «Першацвет». Публікавалася ў анталогіі «Агледзіны», альманахах «Панядзелак», «Літаратурны квартал», «Дзень паэзіі-2005», у часопісах «Першацвет», «Маладосць», «Крыніца», «Беларуская думка», «Полымя», «Беларусь», газеце «Літаратура і мастацтва» і іншых выданнях[4].
Аўтар больш за 100 крытычных і літаратуразнаўчых публікацый, сярод якіх рэцэнзіі, артыкулы, творчыя партрэты і даклады на канферэнцыях па сучаснай беларускай паэзіі[4]. Таццяна Барысюк з’яўляецца вынаходніцай новай цвёрдай формы ў паэзіі — «залатое сячэнне» (13-цірадковая форма верша)[5][6].
Частка вершаў Таццяны Барысюк перакладзена на рускую мову («Моим читателям»; «Почему нашу Русь называют Белою?»; «Советы Лилит»; «Хмурым утром проснувшись» і інш.)[7][8].
Беларускі крытык і літаратуразнаўца акадэмік Уладзімір Гніламёдаў назваў кнігу вершаў «Аўтапартрэт» Таццяны Барысюк сярод дзесяці лепшых кніг, выдадзеных у 2002-м годзе[9].
Артыкулы
Таццяна Пятроўна Барысюк на Вікісховішчы |