У гэтага паняцця ёсць і іншыя значэнні, гл. Брод.
Макс Брод (ням.: Max Brod; 27 мая 1884, Прага, тады Аўстра-Венгрыя — 20 снежня 1968, Тэль-Авіў) — аўстрыйскі пісьменнік, філосаф, публіцыст і журналіст Пражскай школы.
Нарадзіўся ў нямецкамоўнай яўрэйскай сям’і. Скончыў нямецкі ўніверсітэт Карла-Фердынанда ў Празе. З 1912 далучыўся да сіянізму, пасля 1918 — віцэ-прэзідэнт ням.: Judischer Nationalrat (Яўрэйскага нацыянальнага савета). У 1902 пазнаёміўся і пасябраваў з Францам Кафкай, пазней стаў яго душапрыказчыкам і публікатарам яго сачыненняў, напісаў біяграфію Кафкі і некалькі кніг пра яго, манаграфію пра нямецкамоўную літаратуру Прагі. У 1939 разам з жонкай пераехаў у Палесціну. Пісаў для тэатра Габіма.
Аўтар некалькіх раманаў і зборнікаў навел, драматург. Прапагандыст творчасці Верфеля, Гашэка, Яначэка (пра які напісаў кнігу). Палемізаваў з К. Краусам, яго ўласную трактоўку творчасці Кафкі аспрэчваў Вальтэр Беньямін. Выступаў як музыкант і музычны крытык, пераклаў лібрэта опер Сметаны і Яначэка на нямецкую, напісаў манаграфію пра Малера, біяграфію Гейнэ.