wd wp Пошук:
    ⬜

    Герб Навагрудка

    Герб Навагрудка — геральдычны сімвал Навагрудка і Навагрудскага раёна. Герб і сцяг зацверджаны рашэннем Навагрудскага раённага Савета дэпутатаў ад 16 мая 2001 года № 70.

    Гісторыя

    Выява герба з вялікакняжацкага прывілея 1792 года

    Першыя звесткі пра гербы Навагрудка змяшчаюцца ў гербоўніку польскага геральдыста XVI ст. Барташа Папроцкага, у якім гаворыцца, што «ваяводства Наваградскае ўжывае за герб анёла чорнага ў полі чырвоным, горад Наваградак ужывае за герб Пагоню, пры якой ёсць Замак». Праз пэўны час з герба знік замак, i абодва гербы (з чорным анёлам i Пагоняй) пачалі лічыць ваяводскімі. У канцы XVI ст. з гербаў знікае і чорны анёл[1].

    18 сакавіка 1595 караль польскі і вялікі князь літоўскі Жыгімонт Ваза надае новы герб гораду: «у чырвоным полі постаць арханёла Міхала ў чорным узбраенні з крыламі за спінай; у правай руцэ меч, у левай — шалі»[2].

    Вытрымка з адпаведнага вялікакняжацкага прывілея:

    ...печати местской на ратуш Архангела Михаила в одной раце меч, а в другой вага.

    На пачатку XVIII ст. навагрудскі герб быў дапоўнены змеем-д’яблам. Расійскі варыянт герба, зацверджаны ў 1845 г., у асноўным захаваў гэтую ж кампазіцыю, толькі з некаторымі зменамі (архангел павярнуў меч вастрыём на змея, у якога зніклі крылы)[1].

    У 1857 г. Расійскі дэпартамент геральдыкі ўвёў новыя правілы складання зямельных i гарадскіх гербаў, якія прадугледжвалі выкарыстанне знешніх упрыгожанняў. Паводле гэтых правілаў у 1860-х гг. разам з праектамі гербаў больш за дзесятак беларускіх гарадоў быў складзены і новы герб На­ваградка, на якім архангел быў заменены на стылізаванае крыло i руку з мечам[1].

    У сучаснай Беларусі афіцыйны статус атрымаў 16 мая 2001[3]. У гербавым матрыкуле краіны значыцца пад № 74.

    Апісанне

    Герб Навагрудка ўяўляе сабой барочны шчыт, у чырвоным полі якога Святы Арханёл Міхаіл, які стаіць на зялёнай зямлі у чорным даспеху з крыламі за спіной. У правай руцэ ў яго меч, у левай — шалі.

    Гл. таксама

    Зноскі

    1. 1 2 3 Пякарскі Анатоль. Навагрудскія гербы // Спадчына № 5-1993. С. 2-3.
    2. ↑ Цітоў А. Геральдыка беларускіх местаў (XVI — пачатак XX ст.). — Мн.: Полымя, 1998.
    3. ↑ Решение сессии Новогрудского районного Совета депутатов от 16 мая 2001 г. № 70.

    Літаратура

    Тэмы гэтай старонкі (4):
    Катэгорыя·Навагрудскі раён
    Катэгорыя·Навагрудак
    Катэгорыя·Гербы паводле алфавіта
    Катэгорыя·Гербы гарадоў Беларусі