Гатчынскі муніцыпальны раён (руск.: Га́тчинский муниципа́льный райо́н) — муніцыпальнае ўтварэнне ў цэнтральнай частцы Ленінградскай вобласці Расіі. Адміністрацыйны цэнтр — горад Гатчына. Быў утвораны ў верасні 1927 года. Гістарычна яму папярэднічаў Гатчынскі павет, створаны ў лістападзе 1922 года і перайменаваны ў 1923 годзе ў Троцкі павет Ленінградскай (раней — Петраградскай) губерні.
Размешчаны на паўночным захадзе еўрапейскай часткі Расіі. Мяжуе на паўночным усходзе — з горадам федэральнага значэння Санкт-Пецярбургам; на ўсходзе — з Тосненскім муніцыпальным раёнам; на поўдні — з Лужскім муніцыпальным раёнам; на захадзе — з Воласаўскім муніцыпальным раёнам; на паўночным захадзе — з Ламаносаўскім муніцыпальным раёнам. Раён займае плошчу 2,94 тыс. км² (3,45 % плошчы вобласці) — 13-е месца ў рэгіёне.
Адлегласць ад адміністрацыйнага цэнтра раёна да Санкт-Пецярбурга — 42 км.