Crytek GmbH (часта — Crytek Studios; далей — Crytek) — таварыства з абмежаванай адказнасцю (ням.: GmbH), нямецкая прыватная кампанія, якая спецыялізуецца на распрацоўцы камп’ютарных гульняў, гульнявых рухавічкоў і камп’ютарных графічных тэхналогій. «Crytek» створана трыма турэцкімі братамі, Джэватам (англ.: Cevat Yerli), Аўні (англ.: Avni Yerli) і Фарукам Ерлі (англ.: Faruk Yerli) у 1999 годзе. Асноўны штаб Crytek знаходзіцца ў горадзе Франкфурт-на-Майне, Германія. Пяць іншых даччыных студый знаходзяцца ў Кіеве, Украіна (Crytek Kiev), Будапешце, Венгрыя (Crytek Budapest), Сафіі, Балгарыя (Crytek Black Sea), Сеуле, Паўднёвая Карэя (Crytek Korea) і Нотынгеме, Вялікабрытанія (Crytek UK).[2][3][4]
Каманда распрацоўшчыкаў Crytek складаецца з 474 супрацоўнікаў, сабраных з усяго свету: Еўропа (422), Канада (6), Злучаныя Штаты (15), Бразілія (1), Чылі (1), Турцыя (16), Ізраіль (3), Расія (8), Індыя (2), Кітай (1), Японія (1), Паўднёвая Карэя (13), Аўстралія (7), Новая Зеландыя (1).[5] Crytek стала вядомая першым чынам за распрацоўку гульні Far Cry і гульнявога рухавічка CryEngine, першага рухавічка, які выкарыстоўвае інструмент PolyBump, які засноўваецца на тэхналогіі нормалмапінгу. Наступныя распрацоўкі фірмы — рухавічок CryEngine 2 і гульня Crysis, якая грунтуецца на ім.