wd wp Пошук: ⬜

Мікалай Багуслаў Зяновіч

Мікалай Багуслаў Зяновіч (? — 7 верасня 1621) — дзяржаўны і ваенны дзеяч Вялікага Княства Літоўскага.

Староста чачэрскі і прапойскі з 1614, кашталян полацкі з 1618.

Вучыўся ва ўніверсітэце Базеля. У 1620 перайшоў з кальвінізму ў каталіцтва.

Удзельнічаў у бітве пад Хацінам 1621, дзе і памёр ад атрыманых ран.

Сям’я

З шляхецкага роду Зяновічаў герба «Дэспат», сын Крыштафа і Фядоры Валовіч, дачкі Рыгора Валовіча.

Быў двойчы жанаты: з Ганнай Хадкевіч (дачка віленскага кашталяна Гераніма, памерла ў 1620), а ў 1621 ажаніўся паўторна з Ганнай Пац (дачка менскага ваяводы Яна Паца).

Ад першага шлюбу меў дзвюх дачок:

Соф’ю (каля 1610 — 1639), першую жонку вялікага гетмана Паўла Яна Сапегі;
Ганну Соф’ю (каля 1615 — 1664), жонку спачатку Альбрэхта Уладзіслава Радзівіла, а потым Францішка Фларыяна Зебжыдоўскага.

Мікалай Багуслаў быў апошнім мужчынскім прадстаўніком старэйшай лініі роду. Пасля смерці Ганны Соф’і галоўныя маёнткі Зяновічаў (Смаргонь і Глыбокае) адышлі пляменніку яе першага мужа Міхалу Казіміру Радзівілу.

Крыніцы

Насевіч В. Зяновічы // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 1: Абаленскі — Кадэнцыя. — С. 661. — 688 с. — ISBN 985-11-0314-4 (т. 1), ISBN 985-11-0315-2.