У Вікіпедыі ёсць артыкулы пра іншых асоб з прозвішчам Завіша.
Ян Міха́л Заві́ша (польск.: Jan Michał Kieżgaiło Zawisza; 1658 — 20 мая 1685) — дзяржаўны дзеяч Вялікага Княства Літоўскага, староста менскі.
З роду Завішаў прыдомак Кезгайла герба «Лебедзь» зменены (апроч лебедзя на шчыце белая пяціляпёсткавая ружа ў кароне), першы з чатырох сыноў Андрэя Казіміра Завішы, пісара вялікага літоўскага, і Гелены Аляксандры з Агінскіх, кашталянкі троцкай. Ян Міхал ажаніўся з Розай Валадковіч герба «Радван», дачкой Стэфана, падсудка менскага, і Розы Слізень. Па мячу яна была ўнучкай Марціна Казіміра Валадковіча, пісара земскага менскага, і Гелены Кастравіцкай, а па кудзелі — Стэфана Яна Слізня, рэферэндара вялікага літоўскага і старосты крэўскага, і Зоф’і з Катлоў, дачкі войскага старадубскага. Старасціч менскі па бацьку, пасля там жа быў старостам гродавым. Памёр маладым на 27 годзе жыцця ў Менску. Дзяцей не было. Пахаваны ў капліцы Завішаў у менскім бернардзінскім касцёле.