Сяргей Васілевіч Бесараб (нар. 25 ліпеня 1984[1], Навагрудак) — беларускі навуковец у галіне калоіднай хіміі, папулярызатар навукі, тэхналагічны аўтар. Стваральнік Telegram-канала LAB-66 (@lab66[2]), прысвечанага радыяцыйнай, хімічнай і біялагічнай бяспецы, грамадзянскай абароне.
Вучыўся ў сярэдняй школе № 3 у Навагрудку, якую закончыў на выдатна. Падчас вучобы неаднаразова станавіўся пераможцам абласнога і рэспубліканскага этапаў прадметнай алімпіяды па хіміі[3]. Выпускнік кафедры радыяцыйнай хіміі хімічнага факультэта БДУ. У 2010 годзе скончыў магістратуру Інстытута падрыхтоўкі навуковых кадраў НАН Беларусі па спецыяльнасці «Хімія»[4]. З 2010 года працаваў навуковым супрацоўнікам лабараторыі адсарбентаў Інстытута агульнай і неарганічнай хіміі НАН Беларусі[5]. У 2016 годзе скончыў аспірантуру па спецыяльнасці «Калоідная хімія і фізіка-хімічная механіка» (навуковы кіраўнік У. С. Камароў).
Асноўныя навуковыя працы прысвечаны даследаванню ўласцівасцей неарганічных порыстых матэрыялаў, пошуку эфектыўных адсарбентаў і стварэнню новых каталізатараў. Аўтар больш за 50 навуковых прац[6], у тым ліку манаграфіі, шэрагу вынаходстваў і карысных мадэляў. З навуковымі распрацоўкамі двойчы (2009, 2011) перамагаў на Рэспубліканскім конкурсе навуковых прац[1][7]. У 2016 годзе заняў 1-е месца ў беларускім этапе Skolkovo StartupTour-2016 і стаў паўфіналістам конкурсу[1][8]. Як навуковы кансультант супрацоўнічаў з Рэспубліканскім навукова-практычным цэнтрам дзіцячай хірургіі, займаўся распрацоўкай палімерных гідрагеляў для малаінвазіўнага лячэння інфаркту міякарда[9][10][11][12]. У 2017 годзе ў якасці навуковага куратара ўдзельнічаў у арганізацыі і правядзенні першага беларускага навуковага хакатона SciHackathon[13][14][15][16].
Як тэхналагічны эксперт і папулярызатар навукі напісаў болей за 100 артыкулаў. Пачынаў друкавацца ў выданнях «Компьютерра»[17] і «Камп’ютарныя весткі»[18][19][20]. Стаў лепшым тэхнааўтарам 2021 года за артыкул пра фітахімію і таксікалогію атрутных раслін[21] — пераможцу конкурса «Тэхнатэкст-2022», які праводзіць Habr.com[22].
У 2019 годзе стварыў Тэлеграм-канал @lab66 — незалежны інфармацыйны рэсурс пра хімію і хімічную бяспеку.
У 2020 годзе падпісаў Зварот прадстаўнікоў навуковай грамадскасці Рэспублікі Беларусь у сувязі з падзеямі пасля 9 жніўня 2020 года[23]. Выступіў з экспертным абвяржэннем абвінавачання Сцяпану Латыпаву ў падрыхтоўцы атручэння супрацоўнікаў МУС[24]. Пасля быў звольнены з Інстытута агульнай і неарганічнай хіміі НАН Беларусі[25] і далучаны да спісу рэпрэсаваных па палітычных прычынах беларускіх навукоўцаў, якіх падтрымалі ў адкрытым Звароце супраць рэпрэсій[26] каля 800 беларускіх навукоўцаў[27][28][29].
Як навукова-тэхнічны эксперт і эксперт-хімік выступае з шматлікімі артыкуламі і каментарыямі па хімічнай і радыяцыйнай бяспецы, сродках асабістай бяспекі у перыядычных выданнях і СМІ, у тым ліку на Belsat[30][31][32], «Нашай Ніве»[33][34][35][36], «Голасе Амерыкі»[37][38], «Зялёнай сетцы»[39][40][41][42], Новы Час[43], беларускаму Радыё Рацыя[44][45][46], CityDog.by[47][48],dev.by[49][50][51], Zerkalo.io[52]
Радыёаматар-кароткахвалявік з радыёаматарскім пазыўным EU1AEY[53][54].