Стало́віцкі сельсавет — адміністрацыйна-тэрытарыяльная адзінка ў складзе Баранавіцкага раёна Брэсцкай вобласці Беларусі. Адміністрацыйны цэнтр — аграгарадок Сталовічы.
Утвораны 12 кастрычніка 1940 года ў складзе Гарадзішчанскага раёна Баранавіцкай вобласці БССР. З 8 студзеня 1954 года ў складзе Брэсцкай вобласці. 16 ліпеня 1954 года да сельсавета далучана тэрыторыя скасаванага Пастарынскага сельсавета, вёска Новы Свет перададзена ў склад Каўпеніцкага сельсавета Навамышскага раёна[1]. 21 студзеня 1961 года ў склад Гірмантаўскага сельсавета перададзены 2 населеныя пункты (вёскі Драгабыль і Пастарынне)[2]. З 25 снежня 1962 года сельсавет у складзе Баранавіцкага раёна. 21 чэрвеня 1966 года ў склад Мядзеневіцкага сельсавета перададзена вёска Арабаўшчына[3]. 17 лютага 1975 года скасавана вёска Пастарынне (злілася з вёскай Пастарынне Гірмантаўскага сельсавета)[4]. На 1 студзеня 1974 года ў складзе сельсавета было 14 населеных пунктаў[5]. 6 мая 1978 года скасавана вёска Тодараўцы (злілася з вёскай Вялікія Гацішчы)[6].
26 чэрвеня 2013 года ў склад сельсавета былі перададзеныя ўсе населеныя пункты — Завоссе, Круглікі, Мелехавічы, Міхнаўшчына, Мядзеневічы, Новыя Войкавічы, Стайкі, Старыя Войкавічы — скасаванага Мядзеневіцкага сельсавета і частка населеных пунктаў Каўпеніцкага сельсавета з вёскамі Антанова, Вялікая Каўпеніца, Малая Каўпеніца, Новы Свет[7].
Насельніцтва сельсавета паводле перапісу 2009 года — 1674 чалавекі[8], з іх 90,0 % — беларусы, 4,4 % — рускія, 3,5 % — палякі[9].