wd wp Пошук: ⬜

Слуцкі Троіцкі манастыр

У гэтага паняцця ёсць і іншыя значэнні, гл. Троіцкі манастыр. Слу́цкі Тро́іцкі манасты́р, ці Трайчанскі манастыр — праваслаўны мужчынскі манастыр, які існаваў у 15 ст. — 1950-х г. у горадзе Слуцку (цяпер Мінская вобласць), колішні асяродак праваслаўя на землях Вялікага Княства Літоўскага.

Размяшчаўся на левым беразе ракі Случы ў прадмесці Трайчаны, таму вядомы і пад назвай Трайчанскі. Будынкі манастыра не захаваліся.

Гісторыя

Час узнікнення невядомы, упершыню ўпамінаецца ў 1455 годзе. Манастыр меў 2 царквы, жылыя будынкі і гаспадарчыя пабудовы. У гістарычнай літаратуры прынята лічыць, што галоўны храм манастыра — Троіцкая царква — пабудаваны ў 1505 годзе. Вядома, што ў 1654 годзе царква была мураваная. У 1654—1667 гг. і ў 18 ст. манастыр моцна пацярпеў, царква амаль цалкам знішчана. У 1785—1788 гг. царква адбудавана паводле праекта і пад кіраўніцтвам архітэктара Ш. В. Турава ў стылі барока.

Пры манастыры дзейнічала школа граматы і рамёстваў. У 1785—1840 на тэрыторыі комплексу размяшчалася духоўная семінарыя (з 1793 называецца Мінская духоўная семінарыя).

У 1867 годзе ўзведзены мураваны манастырскі корпус з цёплай царквой св. Іаана Багаслова, у 1868 — мураваная брама, каля якой мясцілася яшчэ адна цёплая царква — Дабравешчанская.

Дакладны час закрыцця манастыра невядомы, усе будынкі разбураны.

Комплекс манастыра

Троіцкая царква — крыжова-купальны ў плане храм з дзвюма 3-яруснымі чацверыковымі вежамі-званіцамі на галоўным фасадзе, на паўночнай вежы быў гадзіннік. Тарцовыя сцены крылаў трансепта завершаны фігурнымі франтонамі. Над сяродкрыжжам узвышаўся аб’ём з вялікім купалам на чацверыку, над ім — бельведэр, увянчаны маленькім купалам на светлавым барабане.

Комплекс таксама ўключаў жылыя памяшканні: дом архімандрыта, дом для гасцей, трапезную, мураваны «скабец» са склепам, гаспадарчыя пабудовы — адрыну, стайні, бровар, калодзеж з компасам (на драўляных слупах) і інш.

Рэліквіі

У Троіцкай царкве захоўваліся цудатворны абраз Маці Божай і абраз Казанскай Маці Божай візантыйскага пісьма, Евангелле 1582, пісанае слуцкім князем Юрыем Юр’евічам Алелькавічам, старажытныя партрэты князёў Алелькавічаў, вырабы з серабра і інш.

Літаратура

Кукуня В. Р., Пятровіч Н. І. }Слуцкі Троіцкі манастыр // Беларуская энцыклапедыя: У 18 т. / Рэдкал.: Г. П. Пашкоў і інш.. — Мн.: БелЭн, 2002. — Т. 15: Следавікі — Трыо. — С. 32. — 552 с. — 10 000 экз. — ISBN 985-11-0251-2 (т. 15), ISBN 985-11-0035-8.

Спасылкі

На Вікісховішчы ёсць медыяфайлы па тэме Слуцкі Троіцкі манастыр
Слуцкі Троіцкі манастыр на сайце Radzima.org
Старыя рысункі і фотаздымкі Слуцка на сайце «Глобус Беларусі».