Ско́браўка[1] (трансліт.: Skobraŭka, руск.: Скобровка) — вёска ў Пухавіцкім раёне Мінскай вобласці. Уваходзіць у склад Блонскага сельсавета. Вышыня над узроўнем мора складае 163 метраў. Праз тэрыторыю вёскі праходзіць аўтадарога Мінск — Гомель.
Знаходзіцца за 6 кіламетраў на ўсход ад Мар’інай Горкі і чыгуначнай станцыі Пухавічы.
Найкаштоўнай крыніцай вывучэння мінулага Скобраўкі з’яўляюцца метрычныя кнігі Блоньскай царквы, да прыходу якой адносіцца гэтая вёска. Досыць унікальным для Беларусі фактам з’яўляецца сама захаванасць метрычных кніг ажно з 1738 года.
У 1774 годзе Скобраўка была Слабодкай (Слабодка Скобраўка) — гэта значыць яе жыхары часова атрымалі пэўныя льготы або вызваленне ад павіннасцяў ад заснавальніка паселішча (уладальніка зямлі), напэўна, яны былі вольнымі людзьмі, якія прыйшлі з іншых месцаў дзеля абяцаных ільгот.
У канцы 18 ст. — вёска Ігуменскага павета Мінскай губерні, у 1858 г. вёска ў Блонскай воласці.
У 1893 г. адкрыта школа царкоўнай граматы. У тым жа годзе для яе быў узведзеныдраўляны будынак.
У 1897 г. — у Пухавіцкай воласці. Дзейнічала школа царкоўнай граматы, капліца, хлебазапасны магазін.
У Першую сусветную вайну ў лютым — снежні 1918 года была пад акупацыяй войскаў кайзераўскай Германіі.
25 сакавіка 1918 года згодна з Трэцяй Устаўной граматай вёска абвешчана часткай Беларускай Народнай Рэспублікі. З 1 студзеня 1919 года ў адпаведнасці з пастановай І з’езда КП(б) Беларусі вёска ўвайшла ў склад БССР.
У жніўні 1919 — ліпені 1920 вёска знаходзілася пад польскай уладай.
Пасля рэвалюцыі была адкрыта працоўная школа 1-ай ступені, у якой працавала 2 настаўнікі, каймалася каля 70 вучняў (1922).
У 1933 г. быў створан калгас імя М,І.Калініна, працавала кузня і стальмашня.
У Другую сусветную вайну, з канца чэрвеня 1941 да пачатку ліпеня 1944 года акупаваная войскамі нацысцкай Германіі. З 27 мая 1944 года ў Скобраўцы дзейнічала «Дзіцячае сяло Скобраўка». У яго былі прывезены з Палескай вобласці (цэнтр яе знаходзіўся ў Мазыры) дзеці ва ўзросце ад 6 да 14 гадоў. Лагер называўся «Дзіцячае сяло Скобраўка», а пазней — «Юнацкае сяло „Скобраўка“». Сёння ў цэнтры Скобраўкі ўстаноўлены памятны знак.
Памяць : Пухавіцкі раён: гісторыка-дакументальныя хронікі гарадоў і раёнаў Беларусі / [укладальнік А. А. Прановіч; рэдкалегія: А. М. Карлюкевіч і інш.]. — Мінск : Беларусь, 2003. — 748 с. — 3000 экз. ISBN 985-01-0251-9