Ра́фія[3] (Raphia) — род кветкавых раслін сямейства Пальмавыя (Arecaceae).
Расліны вышынёй да 12[3] м, з адным ці некалькімі стваламі. Лісце перыстае, даўжынёй 15—20[3] м. Суквецці галінастыя, 4—5[3] м у дыяметры. У суквеццях тычынкавыя і песцікавыя кветкі. Плады маюць валакністую абалонку. Монакарпічныя расліны — цвітуць адзін раз і пасля цвіцення адміраюць. У некаторых відаў адмірае толькі надземная частка, а з застаўшагася кораня развіваецца новая расліна.
Расліны роду пашыраны ў трапічных абласцях Афрыкі, па аднаму віду на Мадагаскары і ў Паўднёвай Амерыцы[3]. Растуць на забалочаных глебах, на балотах і затапляльных нізінах.
Лісце і яго чаранкі маюць трывалае валакно, якое выкарыстоўваецца на выраб шчотак, плеценых вырабаў. Лісце выкарыстоўваецца ў якасці дахавага матэрыялу. Плады выкарыстоўваюць у ежу, і з іх вырабляюць алей. З соку гатуюць гарэлку і пальмавае віно.
Паводле сайта The Plant List, род налічвае 20 відаў.