У гэтага паняцця ёсць і іншыя значэнні, гл. Пралеска. Пралеска (Scilla) — род кветкавых раслін сямейства Спаржавыя (Asparagaceae) (раней адносілі да Лілейныя (Liliaceae)). Часта пралескай называюць пералеску.
Шматгадовыя травяністыя цыбульныя расліны вышынёй 10-30 см. Сцябло бязлістае. Лісце шырокалінейнае, прыкаранёвае. Кветкі ў рыхлай гронцы або адзіночныя, сінія, белыя, блакітныя, ружовыя, пурпуровыя. Плод — каробачка. Дэкаратыўныя, ранневеснавыя расліны.
Каля 50 відаў. Пашыраны пераважна ў Еўразіі, Міжземнамор’і і Паўднёвай Афрыцы. Растуць у лясах і на субальпійскіх лугах, большасць эфемероіды. На тэрыторыі Беларусі ў культуры пралеска двухлістая (Scilla bifolia) і пралеска сібірская (Scilla sibirica).