Каўка[1] ці Галка[2](Corvus monedula) — шырока распаўсюджаная птушка роду крумкачовых.
Даўжыня 34—39 см, маса цела 175—280 г. Апярэнне ад чорнага да серабрыста-шэрага (галава і грудзі) колеру. Радужная абалонка вока амаль белая. Палавога дымарфізму няма.
Шырока распаўсюджана ў заходняй частцы Еўразіі акрамя поўначы Скандынавіі, сустракаецца ў Паўночнай Афрыцы. Колькасць 4—8 мільёнаў пар. Паўночныя і ўсходнія папуляцыі пералётныя, зімуюць на поўдні арэала. Засяляе скалістыя ўчасткі ўзбярэжжаў, рэдкія лясы са старымі дрэвамі, населеныя пункты са старымі пабудовамі.
Гняздуецца ў зацішных месцах будынкаў, на слупах, мастах, у гнёздах буйных птушак. У красавіку самка адкладвае 4—6 яек і наседжвае іх 17—18 дзён. Птушаняты вылятаюць з гнязда праз 30—35 дзён. Галка вядзе зграйны лад жыцця, у пошуках корму зграі часта аб’ядноўваюцца з гракамі. Сілкуецца чарвякамі, садавінай і ягадамі, адкідамі, яйкамі дробных птушак.