У Вікіпедыі ёсць артыкулы пра іншых асоб з прозвішчам Тэйт.
Джон Торэнс Тэйт (англ.: John Torrence Tate; 13 сакавіка 1925, Мінеапаліс, Мінесота — 16 кастрычніка 2019) — амерыканскі матэматык, які ўнёс фундаментальны ўклад у алгебраічную тэорыю лікаў, арыфметычную геаметрыю і звязаныя з імі галіны алгебраічнай геаметрыі.
Прафесар-эмерыт Гарвардскага ўніверсітэта. Член Нацыянальнай акадэміі навук ЗША (1969), замежны член Французскай акадэміі навук (1992).
Нарадзіўся ў сям’і прафесара фізікі Мінесотскага ўніверсітэта і рэдактара часопіса Physical Review Джона Торэнса Тэйта-старэйшага; маці — Лоіс Беатрыс Фослер — настаўніца англійскай мовы.
Ступень бакалаўра атрымаў у Гарвардскім універсітэце, у 1950 годзе ў Прынстанскім універсітэце атрымаў ступень Ph.D. пад кіраўніцтвам Эміля Арціна. Пасля гэтага выкладаў у Гарвардзе на працягу 36 гадоў, у 1990 годзе перайшоў у Тэхаскі ўніверсітэт і працаваў там да сваёй адстаўкі ў 2009 годзе.
Удзельнік групы Бурбакі, прычым адзін з нямногіх яе ўдзельнікаў-нефранцузаў.