«Амерыканская гісторыя Ікс» (англ.: American History X) — амерыканская кінадрама 1998 года аб неанацыстах 1990-х гадоў. Карціна з’яўляецца дэбютам Тоні Кэя, як кінарэжысёра і Дэвіда Маккены як сцэнарыста. Сярод вартасцяў фільма крытыкі адзначалі таленавітую акцёрскую гульню выканаўцы галоўнай ролі Эдварда Нортана, за якую ён быў намінаваны на некалькі кінапрэмій, у тым ліку на «Оскар». Да недахопаў «Амерыканскай гісторыі Ікс» былі прылічаныя некаторыя залішне жорсткія сцэны гвалту. Тым не менш, большасць крытыкаў палічылі, што гэтыя сцэны толькі надаюць карціне вялікую праўдападобнасць. Карціна займае 311-е месца ў спісе «500 найвялікшых фільмаў усіх часоў» па версіі часопіса Empire і ўваходзіць у спіс 250 лепшых фільмаў па версіі IMDb.