У Вікіпедыі ёсць артыкулы пра іншых асоб з прозвішчам Славінскі. У Вікіпедыі ёсць артыкулы пра іншых асоб з прозвішчам Качароўскі.
Ада́м Сямё́навіч Славі́нскі (сапр. Качаро́ўскі) (11 верасня 1885, Панінка, Наваград-Валынскага павета Валынскай губерні — 3 лістапада 1937[1]) — удзельнік рэвалюцыйнага руху ў Польшчы, Расіі і Беларусі, партыйны і дзяржаўны дзеяч БССР. З 1907 г. член Варшаўскай арганізацыі СДКПіЛ.
Нарадзіўся 11 верасня 1885 года ў Панінцы Наваград-Валынскага павета Валынскай губерні (цяпер — Палонскі раён Хмяльніцкай вобласці Украіны). У 1907 і 1909 гг. быў арыштаваны.
З 1912 года — ў Санкт-Пецярбургу, дзе ў час Лютаўскай рэвалюцыі 1917 года ўзначальваў чырвонагвардзейскі атрад, потым Чырвоную гвардыю Маскоўска-Застаўскага раёна Петраграда.
Удзельнік Кастрычніцкай рэвалюцыі 1917 г. у Петраградзе.
Са студзеня 1918 года — ў Мінску, старшыня бюро Мінскай групы СДКПіЛ.
У час нямецкай акупацыі Беларусі член Мінскага падпольнага райкома РКП(б), са жніўня 1918 г. член краявога камітэта камуністычных арганізацый Беларусі і Літвы.
Са снежня 1918 г. начальнік Мінскай гарадской міліцыі, загадчык Мінскага губернскага аддзела ўпраўлення ўнутраных спраў, член Мінскага губернскага ВРК.
З лютага 1919 г. камісар 52-й (Заходняй) стралковай дывізіі.
У пачатку 1920 г. арганізатар партызанскага руху ў Мінскай губерні, з мая 1920 г. начальнік палітаддзела 57-й стралковай дывізіі, у ліпені — жніўня 1920 г. старшыня Гродзенскага ВРК.
З 1920 г. наркам земляробства БССР, у 1924—1928 гг. прадстаўнік КПЗБ пры ЦК КП(б)Б, узначальваў Бюро дапамогі Кампартыі Заходняй Беларусі пры ЦК КП(б)Б.
У 1928—1930 гг. адказны сакратар Мінскага акруговага і гарадскога камітэтаў КП(б)Б, адначасова старшыня МОПРа БССР.
У 1934—1937 гг. начальнік палітаддзела Маскоўска-Беларуска-Балтыйскай чыгункі.
Член ЦБ КП(б)Б у 1920—1924 гг., член ЦК КП(б)Б у 1925—1932 гг., член ЦК КПЗБ у 1926—1935 гг., член ЦК КПП з 1930 г., член ЦВК СССР у 1925—1929 гг., член ЦВК БССР у 1920—1931 гг., член Прэзідыума ЦВК БССР у 1922—1924 гг.
9 ліпеня 1937 года арыштаваны, расстраляны 3 лістапада 1937 года[2]. Рэабілітаваны ў 1955 годзе.
У яго гонар названы вуліцы Мінска [1] і Гродна.[3]