Стыло, або пісала (стар.-грэч.: στῦλος — слуп, калона) — прылада для пісьма, востраканцавы цыліндрычны стрыжань (даўжынёй 8-15 см і дыяметрам каля 1 см) з косці, металу або іншага цвёрдага матэрыялу. Стылы шырока ўжываліся ў антычнасці і сярэднявеччы. Завостраным канцом стыла наносілі (надрапвалі) тэкст на васковых таблічках. Супрацьлеглы канец рабілі сплошчаным (у выглядзе лапаткі) і акруглым, каб сціраць напісанае.
На Беларусі стылы знойдзены ў Навагрудку, Ваўкавыску, Мінску, Брэсце, Полацку, Браславе, Слуцку, Тураве, Пінску, Копысі, Капылі і Друцку. Ужываліся да XV ст.