Радоўка бела-карычневая (Tricholoma albobrunneum) — від шапкавых базідыяльных грыбоў з роду Радоўка (Tricholoma) сямейства Радоўкавыя (Tricholomataceae).
Пладовае цела грыба — шапка на ножцы. Шапка грыба дыяметрам 4—9 см, спачатку пукатая, потым пукатая з бугром, каштанава-карычневага колеру, трохі ліпкая. Мякаць белая, пад скуркай каштанава-карычневатая, з мучным пахам і смакам. Ножка цыліндрычная, суцэльная, 1—2 см у дыяметры і 4—6 см у даўжыню. Колер ножкі белы або з адценнем шапкі грыба. Пласцінкі белыя з чырванавата-бурымі плямамі, частыя, прырослыя. Споры гладкія, бясколерныя.
Расце ў хвойных, пераважна сухіх сасновых лясах. Пладовыя целы з’яўляюцца ў ліпені — верасні.
Ядомы грыб[1]. Па іншых дадзеных (Maser, 1967) — ядавіты.