У Вікіпедыі ёсць артыкулы пра іншых асоб з прозвішчам Усцюгаў. Кузьма Гаўрылавіч Усцюгаў (нар. 25 лістапада 1929, с. Глядзянскае, Прытабольны раён, Курганская вобласць, РСФСР — 1996) — расійскі і беларускі архітэктар.
У 1948—1954 гадах вучыўся ў Новасібірскім інжынерна-будаўнічым інстытуце імя В. У. Куйбышава па спецыяльнасці «Архітэктура». У 1954—1956 гадах працаваў архітэктарам, старэйшым архітэктарам у праектным інстытуце «Крайпраект»[1] у Барнауле[2]; у 1956 годзе інжынерам-архітэктарам інстытута «УНДІгідравугаль» у Новакузнецку; у 1956—1958 гадах старэйшым архітэктарам, кіраўніком брыгады Сібірскага філіяла «Дзіпрамез»[ru]; у 1958—1962 гадах кіраўніком групы, галоўным архітэктарам праектаў, начальнікам архітэктурна-будаўнічага аддзела, галоўным інжынерам «Кузбасгарпраект»[1].
У 1962—1984 гадах працаваў у інстытуце «Гомельграмадзянпраект» кіраўніком АПМ, галоўным архітэктарам праектаў. У 1984—1989 гадах начальнік Упраўлення па будаўніцтве і архітэктуры Гомельскага аблвыканкама. З 1989 года зноў у «Гомельграмадзянпраекце», працаваў галоўным архітэктарам праектаў, у 1990—1992 — вядучым архітэктарам[1].
Член Саюза архітэктараў СССР з 1961 года. Член КПСС з 1962 года. Пражываў у г. Гомель[3].
Узнагароджваўся граматамі інстытута, ордэнам Працоўнага Чырвонага Сцяга (1966[2]/1970[1]), медалём «За доблесную працу. У адзначэнне 100-годдзя з дня нараджэння У. І. Леніна» (1970)[1], бронзавымі медалямі ВДНГ СССР за забудову і добраўпарадкаванне пасёлкаў Камунар Буда-Кашалёўскага (1976) і Крынічны (1987) Мазырскага раёнаў[2].
Асноўныя працы: жылыя дамы па праспекце Металургаў[ru]; вытворчы корпус «Кузбасгарпраекта» ў Кемераве. Удзельнічаў у распрацоўцы генпланаў Гомеля (1964), Мазыра, Рэчыцы, Рагачова, Чачэрска, Парычаў, Лельчыцаў, Нароўлі, Акцябрскага (1966—1984), аўтар праектаў забудовы пасёлкаў Уза і Дуравічы; прыбудовы да Хойніцкага райкама партыі; клуба са спартзалай у п. Акцябр Буда-Кашалёўскага раёна[2].