Жуль Рымэ (фр.: Jules Rimet; 14 кастрычніка 1873 — 16 кастрычніка 1956) — заснавальнік і прэзідэнт парыжскага футбольнага клуба «Рэд Стар», затым прэзідэнт федэрацыі футбола Францыі і, нарэшце, трэці прэзідэнт ФІФА. Знаходзіўся на пасадзе з 1921 па 1954 год, тым самым усталяваў абсалютны рэкорд праўлення арганізацыяй: яго прэзідэнцкі мандат быў сапраўдны на працягу 33 гадоў, без перапынку.
Стаяў ля вытокаў стварэння ФІФА, з’яўляўся піянерам развіцця футбола на Еўрапейскім кантыненце. Натхнёны поспехамі алімпійскіх футбольных турніраў, стаў ідэйным натхняльнікам правядзення чэмпіянатаў свету па футболе, на якіх аж да 1970 года галоўны прыз насіў яго імя — Кубак Жуля Рымэ (таксама вядомы як «Залатая багіня»).