У Вікіпедыі ёсць артыкулы пра іншых асоб з прозвішчам Марцінкевіч. Галіна Іосіфаўна Марцінкевіч (руск.: Галина Иосифовна Марцинкевич, нар. 9 кастрычніка 1935, Чэрвень, БССР) — савецкі і беларускі вучоны-географ, доктар геаграфічных навук, прафесар кафедры геаэкалогіі геаграфічнага факультэта БДУ.
Галіна Іосіфаўна нарадзілася 9 кастрычніка 1935 года ў горадзе Чэрвень Мінскай вобласці. У 1945 г. з сям’ёй пераехала ў г. Брэст, дзе ў 1953 г. скончыла сярэднюю школу з залатым медалем.
З 1953 па 1958 гады — студэнтка геаграфічнага факультэта БДУ. Завяршыўшы вучобу, атрымала дыплом з адзнакай і рэкамендацыю для паступлення ў аспірантуру.
З 1958 па 1960 гг. — тэхнік-глебазнаўца і інжынер-глебазнаўца Інстытута глебазнаўства Акадэміі сельскагаспадарчых Навук БССР.
З 1960 па 1963 гг. — аспірантка кафедры фізічнай геаграфіі (пазней кафедра фізічнай геаграфіі СССР) БДУ.
З 1963 года — праца ў БДУ у якасці асістэнта, старэйшага выкладчыка, дацэнта, прафесара. У 1966 г. абараніла кандыдацкую дысертацыю, у 1970 г. атрымала вучонае званне дацэнта, у 1992 г. абараніла доктарскую дысертацыю, у 1994 г. атрымала вучонае званне прафесара.
З 1995 года па цяперашні час — член савета па абароне дысертацый пры БДУ, з 2001 па 2011 г. — член савета па абароне дысертацый пры БНТУ.
Галіна Іосіфаўна ўдзельнічае ў выкананні адукацыйных праектаў па міжнароднай праграме Tempus.
Спіс яе публікацый налічвае 370 найменняў, у тым ліку 10 манаграфій, 8 падручнікаў і вучэбных дапаможнікаў, каля 55 ландшафтных карт рознага маштабу, уключаючы ландшафтныя карты Беларусі для сярэдняй школы, 185 навуковых артыкулаў, шэраг тэзісаў дакладаў на міжнародных і рэспубліканскіх канферэнцыях.