wd wp Пошук:

Аляксей Ігаравіч Санчук

У Вікіпедыі ёсць артыкулы пра іншых асоб з прозвішчам Санчук.

Аляксей Ігаравіч Санчук (нар. 18 ліпеня 1990) — беларускі музыкант-аматар (барабаны), удзельнічаў у праекце Патрабуем разысціся, які граў на маршах і дваравых канцэртах у Мінску ў 2020 годзе. Палітычны зняволены, абвінавачаны і асуджаны падчас пратэстаў у Беларусі ў 2020 годзе.

Біяграфія

Санчук скончыў Менскі архітэктурна-будаўнічы каледж. Да свайго арышту ў 2020 Аляксей займаўся зборкай мэблі. На акцыях пратэсту пазнаёміўся з іншымі музыкамі, разам з якімі стварылі праект «Патрабуем разысціся»: музыкі гралі на маршах пратэсту і ладзілі выступы ў дварах у Мінску ў 2020[1][2].

Сям’я

Жанаты, мае непаўнагадовую дачку.

Палітычны пераслед

Аляксей Санчук быў затрыманы 4 жніўня 2020 позна ўвечары з-за таго, што ён разам з Сяргеям Шчыценка расклейваў і распаўсюджваў агітацыйныя плакаты і ўлеткі. Тады мужчын затрымлівалі адразу на трох машынах міліціі, яны былі дастаўлены ў РАУС Савецкага раёна Мінска, дзе мужчын пакінулі на ноч у ізалятары да суда. У дадатак да гэтага, машыну Санчука тады эвакуавалі, бо ў ёй знайшлі ўлёткі на выбарчую тэматыку[3]. На наступны дзень, 5 жніўня ў судзе Савецкага раёна суддзя Вера Галаўкова прызначыла Санчуку 10 сутак арышту. Наступны раз Санчука адміністрацыйна судзілі 21 жніўня, суддзя Алена Шылько прызначыла яму штраф памерам у 25 базавых велічын (675 рублёў)[4].

Крымінальны пераслед Аляксея Санчука пачаўся з затрымання супрацоўнікамі ГУБАЗіКа 4 лістапада 2020 на рэпетыцыйнай кропцы ў Мінску разам з іншымі музыкамі. Пры затрыманні яго збілі дзеля таго, каб ён разблакаваў тэлефон. Агулам было затрымана 16 чалавек, сем чалавек адпусцілі адразу, тры дзяўчыны атрымалі штрафы, а шэсць мужчын, у тым ліку, Санчук пазней трапілі на суткі арышту нібыта за ўдзел у несанкцыянаванай акцыі.

На наступны дзень, 5 лістапада, на тэлеканале АНТ у выпуску навін выйшаў сюжэт «Закон «па барабану», дзе была выкладзена наступная версія падзей: «у падвальным памяшканні, дзе праходзіла рэпетыцыя, затрымалі дзевяць барабаншчыкаў, якія рэгулярна ўдзельнічалі ў пратэстах» і «задавалі тэмп на маршах», а таксама прымалі ўдзел у дваровых канцэртах. Акрамя гэтага сцявярджалася, што сярод музыкаў былі анархісты, і барабаншчыкі нібыта збіраліся паліць пудзіла з выявай прадстаўнікоў улады. Былі паказаны кадры з допыта Санчука, на якіх невядомая асоба пытаецца ў яго, за што канкрэтна ён быў затрыманы, а Санчук адказвае, што не ведае, таксама распавядае, што ён вучыў рытм. Пасля адбыцця арышту ён не выйшаў на волю, а ўжо праз тыдзень яму прад’явілі абвінавачванне па ч. 1 артыкула 342 Крымінальнага кодэкса (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх)[5][6].

3 снежня 2020 года сумеснаю заяваю 9 беларускіх праваабарончых арганізацыяў, сярод якіх Праваабарончы цэнтр «Вясна», Беларускі Хельсінкскі камітэт, Беларускі ПЭН-цэнтр Аляксей Санчук разам з іншымі быў прызнаны палітычным зняволеным. У заяве адзначаецца, што «ацэньваем пераслед як палітычна матываваны ў сувязі з рэалізацыяй ім свабоды мірных сходаў і выказвання свайго меркавання адносна абвешчаных вынікаў выбараў Прэзідэнта Рэспублікі Беларусь»[7].

У падтрымку Санчука ў інтэрнэце былі запушчаны флэшмобы #яучилритм і #свободусанчуку[8][9].

У лютым 2021 стала вядома, што Аляксею дадалі абвінавачванне па арт. 293 Крымінальнага кодэкса (Удзел у масавых беспарадках).

Разгляд справы Санчука пачаўся 15 красавіка ў судзе Маскоўскага раёна Мінска, справу разглядала суддзя Таццяна Пірожнікава, абвінавачванне прадстаўляў пракурор Яўген Серякоў (прымаў удзел у палітычных судовых парцэсах і да 2020 года, у 2017 вінаваціў анархіста Касінерава)[10]. Санчука вінавацілі ў наступным: перакрываў праезную частку, аказваў відавочнае непадпарадкаванне супрацоўнікам МУС, крычаў лозунгі, гучна пляскаў далонямі, размахваў бел-чырвоным-белым сцягам, арганізаваў супольнасць, дзе навучаў людзей, схіляў асобаў да групавых дзеянняў, якія груба парушаюць грамадскі парадак; да гэтага дадаўся матэрыяльны пазоў на суму 161 900 рублёў за нібыта блакаванне дарог 27 верасня, 18 кастрычніка, 4 кастрычніка, 25 кастрычніка, 1 лістапада 2020. З усяго пералічанага Санчук прызнаў толькі ўдзел у акцыях[11]. На допытах у судзе Санчук заявіў пра ціск і парушэнні падчас следства, папрасіў улічваць толькі тыя паказанні, якія ён даў на судзе. У якасці доказаў віны на судзе былі паказаны піратэхнічныя вырабы і стрэльба для падводнага палявання, якія былі знойдзены падчас ператрусу ў гаражы ў іншага чалавека, але на іх не былі знойдзены адбіткі пальцаў Санчука. Праз тры тыдні, 7 траўня адбыліся судовыя спрэчкі, дзе пракурор Серякоў папрасіў суд пакараць Санчука шасцю гадамі пазбаўлення волі ва ўмовах узмоцненага рэжыму[12].

13 траўня суддзя Пірожнікава асудзіла Санчука на шэсць гадоў пазбаўлення волі ва ўмовах узмоцненага рэжыму[13].

Падчас следства Аляксей Санчук ўтрымліваўся ў СІЗА-1 Мінска. Пасля прысуду быў пераведзены ў папраўчую калонію № 17 у Шклове.

Зноскі

  1. «Пытаемся устроить праздник дешево и сердито». Кто эти люди, играющие на воскресных маршах (руск.)
  2. Творчасць палітзняволеных: якую музыку можна пачуць праз краты? (бел.)
  3. У Мінску палююць на расклейшчыкаў палітычных ўлётак і саджаюць іх на «суткі» (бел.)
  4. Адміністратыўны перасьлед (бел.)
  5. На барабанщика, выступавшего на воскресных маршах, завели уголовное дело Архівавана 24 студзеня 2021. (руск.)
  6. Жонка палітзняволенага барабаншчыка Аляксея Санчука: «Дачка лічыць яго Героем» (бел.)
  7. Заява праваабарончых арганізацый Беларусі аб прызнанні 15 новых палітвязняў (бел.)
  8. Барабанщики из различных стран Европы выразили солидарность с задержанным Алексеем Санчуком и беларусским народом (руск.)
  9. АЛЕКСЕЙ САНЧУК — БАРАБАНЩИК-ЛЮБИТЕЛЬ (руск.)
  10. «Кто такая Ермошина, там знают»: Показываем прокуроров, требующих большие сроки для политических (руск.)
  11. Палітзняволенага барабаншчыка Санчука судзяць па некалькіх «пратэсных» артыкулах Крымінальнага кодэкса (бел.)
  12. Пракурор просіць пакараць палітзняволенага барабаншчыка Санчука 6 гадамі калоніі (бел.)
  13. Да 6 гадоў калоніі асудзілі палітзняволенага барабаншчыка Аляксея Санчука (бел.)

Спасылкі

Тэмы гэтай старонкі (12):
Катэгорыя·Артыкулы пра асоб без партрэтаў
Катэгорыя·Вікіпедыя·Артыкулы з пераазначэннем значэння з Вікідадзеных
Катэгорыя·Нарадзіліся ў 1990 годзе
Катэгорыя·Асобы, прызнаныя вязнямі сумлення праваабарончым цэнтрам «Вясна»
Катэгорыя·Вікіпедыя·Артыкулы пра асоб, для якіх не існуюць старонкі віду «І. Іпб. Прозвішча»
Катэгорыя·Палітвязні Беларусі
Катэгорыя·Вікіпедыя·Біяграфіі сучаснікаў
Катэгорыя·Вікіпедыя·Артыкулы пра асоб, для якіх не існуюць старонкі віду «Імя Прозвішча»
Катэгорыя·Вікіпедыя·Артыкулы пра асоб, для якіх не існуюць старонкі віду «І. Прозвішча»
Катэгорыя·Выпускнікі Мінскага дзяржаўнага архітэктурна-будаўнічага каледжа
Катэгорыя·Асобы
Катэгорыя·Нарадзіліся 18 ліпеня