Энтамало́гія (з грэч.: entoma, «насякомыя»; -логія, «навука») — раздзел заалогіі, які вывучае насякомых.
Паводле задач падзяляецца на агульную і прыкладную. Агульная, ці тэарэтычная, энтамалогія вывучае будову і жыццядзейнасць насякомых, іх індывідуальнае развіццё і эвалюцыю, разнастайнасць форм, размеркаванне на Зямлі ў часе і прасторы, узаемаадносіны з асяроддзем і інш. Прыкладная энтамалогія (ветэрынарная, лясная, медыцынская, сельскагаспадарчая) вывучае насякомых-паразітаў, крывасмокаў, пераносчыкаў хвароб жывёл, чалавека і раслін, шкоднікаў лясных і сельскагаспадарчых раслін, прадуктаў, а таксама карысных насякомых, якія даюць чалавеку мёд, шоўк, апыляльнікаў раслін, ворагаў шкоднікаў, глебаўтваральнікаў. Унутры энтамалогіі вылучаюць калеаптэралогію (вывучае цвердакрылых), лепідаптэралогію (лускакрылых), мірмекалогію (мурашак) і інш.
Сярод беларускіх энтамолагаў вядомыя Анатоль Іванавіч Радкевіч і Усевалад Анатолевіч Радкевіч.