Чапялё́ўскі сельсавет — былая адміністрацыйна-тэрытарыяльная адзінка ў складзе Салігорскага раёна Мінскай вобласці. Цэнтр — вёска Чапялі.
Утвораны 20 жніўня 1924 года ў складзе Старобінскага раёна Слуцкай акругі БССР. З 9 чэрвеня 1927 года ў складзе Бабруйскай акругі. Пасля скасавання акруговай сістэмы 26 ліпеня 1930 года ў Старобінскім раёне БССР. З 1935 года ў Старобінскім раёне Слуцкай акругі. Пасля ўвядзення абласнога падзелу 20 лютага 1938 года ў Старобінскім раёне Мінскай вобласці. 10 ліпеня 1939 года ў склад сельсавета з Кіраўскага сельсавета Слуцкага раёна перададзена вёска Шабунькі[1]. З 20 верасня 1944 года па 8 студзеня 1954 года ў складзе Бабруйскай вобласці. 11 кастрычніка 1961 года ў склад Краснадворацкага сельсавета перададзены вёскі Астроўкі, Балотчыцы і Касынічы[2]. З 25 снежня 1962 года — у складзе Любанскага раёна, з 6 студзеня 1965 года — у Салігорскім раёне. 30 кастрычніка 2009 года сельсавет скасаваны, населеныя пункты перададзены ў склад Чыжэвіцкага (вёскі Бранчыцы, Глядкі, Куляшы, Шабунькі) і Краснадворскага сельсаветаў (вёскі Прусікі, Прусы, Чапялі)[3].
Паводле перапісу 2009 года насельніцтва сельсавета складае 685 чалавек[4], з іх 97,2 % — беларусы[5].