Хімачал-Прадэш (англ.: Himachal Pradesh з хіндзі: «краіна заснежаных гор») — штат на поўначы Індыі. Гранічыць са штатамі Джаму і Кашмір на поўначы, Пенджаб на захадзе і паўднёвым захадзе, Хар’яна і Утар-Прадэш на поўдні, Утаракханд на паўднёвым усходзе, з Кітаем (Тыбет) на ўсходзе. Займае 17-е месца сярод штатаў па плошчы (55 673 км²) і 20-е па насельніцтву (6 млн чалавек, 2001). Адміністрацыйны цэнтр — Шымла, некалі — летняя сталіца Брытанскай Індыі.
Адзін з багацейшых штатаў Індыі, пастаўшчык гідраэлектраэнергіі для Дэлі, Пенджаба і Раджастхана. 45 % ВУП дае сельская гаспадарка, у якой занята больш за 70 % працоўных. Вырошчваюць пшаніцу, рыс, ячмень, кукурузу. ВУП штата складае каля 6 млрд долл. ЗША (2006), штогадовы эканамічны рост каля 10 %.
95 % насельніцтва — індуісты (найвялікшая прапорцыя ў Індыі), 2 % — мусульмане.