Фрэдэрык (Фрэдэры) Містраль (фр. Frédéric Mistral, гкс. Frederic Mistral / Mistrau, па класічнай норме, або Frederi, па яго ўласнай норме, 8 верасня 1830, Маян- 25 сакавіка 1914, тамака жа) — правансальскі паэт і лексікограф. Лаўрэат Нобелеўскай прэміі па літаратуры 1904 года. Прэмія прысуджана «ў прызнанне свежай арыгінальнасці і сапраўднай натхнёнасці паэтычных твораў, якія праўдзіва адлюстроўваюць пэйзажы і духоўную прыроду свайго народа, а таксама яго важнай дзейнасці ў якасці правансальскага філолага»[4].
Пасля шэрагу невялікіх п’ес на аксітанскай (правансальскай) мове ён напісаў знакамітую сельскую паэму «Miréio» («Мірэй», 1859, з французскім перакладам), сустрэтую вельмі спрыяльна, яна атрымала прэмію Французскай акадэміі. Сюжэт паэмы ён перапрацаваў потым у опернае лібрэта, да якога Шарль Гуно напісаў музыку («Mireille»).