Тра́нспартныя во́йскі Узбро́еных сіл Рэспу́блікі Белару́сь — спецыяльныя войскі ў складзе Узброеных сіл Беларусі, прызначаныя для выканання задач транспартнага забеспячэння воінскіх фарміраванняў Беларусі.
Пастановай Савета Міністраў Рэспублікі Беларусь ад 20 верасня 1991 года №1096-XII чыгуначныя войскі, якія дыслакуюцца на тэрыторыі Рэспублікі Беларусь, былі падпарадкаваныя Савету Міністраў Рэспублікі Беларусь.
Пастановай Савета Міністраў Рэспублікі Беларусь ад 18 снежня 1992 года № 760 «Аб чыгуначных войсках» на базе 30‑й асобнай чыгуначнай брыгады былі ўтвораны чыгуначныя войскі Рэспублікі Беларусь.
У лістападзе 2001 года ўпраўленне чыгуначных войскаў Рэспублікі Беларусь было пераўтворана ў дэпартамент чыгуначных войскаў Міністэрства абароны Рэспублікі Беларусь[2].
11 мая 2006 года Прэзідэнт Рэспублікі Беларусь Аляксандр Лукашэнка падпісаў Указ № 312 «Аб некаторых мерах па ўдасканаленні транспартнага забеспячэння Узброеных Сіл, іншых войскаў і воінскіх фарміраванняў Рэспублікі Беларусь». Дакумент прыняты ў мэтах стварэння адзінай сістэмы транспартнага забеспячэння Узброеных Сіл, іншых войскаў і воінскіх фарміраванняў Беларусі. Згодна з Указам на базе існуючых чыгуначных, аўтамабільных і дарожных войскаў былі створаны транспартныя войскі Беларусі.
Органам ваеннага кіравання транспартных войскаў з’яўляецца Дэпартамент транспартнага забеспячэння Міністэрства абароны.
Агульнае кіраўніцтва транспартнымі войскамі ажыццяўляе Міністр абароны, а непасрэднае — начальнік Дэпартамента транспартнага забеспячэння, які прызначаецца на пасаду Прэзідэнтам Рэспублікі Беларусь. З 16 жніўня 2017 года пасаду займае палкоўнік Юрый Мікалаевіч Шаплаўскі.