Сіваграк, таксама Сіваваронка[1] (Coracias) — род птушак сямейства Сівагракавыя (Coraciidae), атрад Ракшападобныя (Coraciiformes).
Даўжыня цела сіваграка звычайнага да 35 см, маса да 190 г. Апярэнне зеленавата-блакітнае з яркім адлівам. На крылах і хвасце ёсць цёмна-сінія ўчасткі. Спіна рыжавата-карычневая. Сярэдняя пара пёраў хваста цёмна-бурая з ліловым напылам. Дзюба моцная, крыху кручкаватая. Корміцца буйнымі жукамі, прамакрылымі, радзей дробнымі пазваночнымі. Нясе 4—6 яец.
Існуе 8 відаў. Пашыраны ў Еўразіі і Афрыцы. Жывуць у лесастэпах, лясах, на ўзлесках, каля высечак, у парках і гаях, саваннах, на акультураных землях. На тэрыторыі Беларусі жыве 1 від: сіваграк звычайны (Coracias garrulus) (народныя назвы: краска, сінюга) — пералётная птушка. Зімуе ў Афрыцы.