У Вікіпедыі ёсць артыкулы пра іншых асоб з прозвішчам Тарасаў. Сяргей Васільевіч Тарасаў (20 студзеня 1961, г. Мінск, БССР) — беларускі археолаг, гісторык, пісьменнік. Кандыдат гістарычных навук (1992), дацэнт.
У 1982 г. скончыў Мінскі педінстытут. З 1982 г. працаваў у Інстытуце гісторыі АН БССР (з 1991 — НАН Беларусі), з 2001 г. узначальваў аддзел археалогіі сярэдневяковага перыяду. У 1992 г. абараніў кандыдацкую дысертацыю на тэму «Гісторыка-тапаграфічная структура Полацка IX—XVIII стст». З’яўляецца спецыялістам у пытаннях узнікнення і развіцця беларускіх гарадоў IX—XVIII стст., прыняцця і распаўсюджання хрысціянства на Беларусі, спалучэння і ўзаемаадносін хрысціянства і паганства, узнікнення і развіцця культавага дойлідства XI—XIII стст., пісьменнасці і эпіграфікі. Даследаваў археалагічныя помнікі старажытнага Полацка: праводзіў раскопкі Верхняга замка, Ніжняга замка, першапачатковага гарадзішча і паселішча, Вялікага і Запалоцкага пасадаў, паселішчаў на Востраве, Задзвінні і іншых раёнаў старажытнага Полацка. Адкрыў месцазнаходжанне Полацкага пасада IX—X стст., некалькіх невядомых раней паселішчаў-спадарожнікаў Полацка XI—XII стст. Вылучыў асноўныя этапы развіцця гісторыка-тапаграфічнай структуры Полацка IX—XVII стст., заканамернасці фарміравання гарадской дэмаграфіі.
Быў удзельнікам міжнароднай праграмы эксперыментальнага плавання на копіях старажытных караблёў па Дзвіне, Дняпру і Прыпяці. У 1984—1986 гг. браў удзел у археалагічных даследаваннях Мінскага замчышча, гарадзішча на рацэ Менцы. У 2000—2006 гг. даследаваў старажытны Мінск, рабіў раскопкі і назіранні на вуліцах Няміга і Гандлёвая, у Верхнім горадзе, Ракаўскім прадмесці, ажыццяўляў археалагічны нагляд на будаўніцтве гасцініцы «Еўропа» і інш. аб’ектаў. З’яўляецца сааўтарам навуковай канцэпцыі музея гісторыі Мінска. Аўтар больш чым 50 навуковых прац, у тым ліку, апублікаваных у Расіі, Украіне, Польшчы, Германіі, ЗША, Швецыі. Таксама з’яўляецца аўтарам падручніка «Мая Радзіма — Беларусь» для 4-га класа агульнаадукацыйнай школы і сааўтарам навуковых дапаможнікаў для ВНУ. Член Саюза беларускіх пісьменнікаў, аўтар кніг для дзяцей і падлеткаў, сааўтар мастацкіх зборнікаў. Мастацкія творы друкаваліся таксама ў Расіі, Украіне, Літве.
У 1987—1999 гг. быў аўтарам і вядучым шэрага праграм Беларускага тэлебачання:
Аўтар і вядучы праграм:
«Крок», «Вецер вандраванняў», «Скарбы беларускай гісторыі», «Кола гадзіны», «Беларускі хата».
Аўтар сцэнарыяў мастацкіх і дакументальных фільмаў:
«Иди и смотри», «Пастка для зубра. Вітаўт», «Пастка для зубра. Ягайла», «Да вас, сучаснікі мае», «Званы Сафіі», «Слава Оршы», «Буквар», «Замкі Беларусі», «Беларусь на крыжы вякоў» і інш.