Сеймур Майран Хэрш (англ.: Seymour Myron (Sy) Hersh; нар. 8 красавіка 1937, Чыкага, ЗША) — амерыканскі журналіст, праваабаронца, лаўрэат Пулітцэраўскай прэміі, лаўрэат прэміі За ўклад у развіццё свабоднай прэсы фонду сродкаў масавай інфармацыі ў Лейпцыгу, лаўрэат прэміі Рыдэнаура (2005).
Нарадзіўся ў яўрэйскай[3] сям’і, у Чыкага. У Чыкагскім універсітэце атрымаў журналісцкую адукацыю. Міжнародная вядомасць прыйшла да яго падчас вайны ў В’етнаме, калі ён раскрыў учыненую амерыканскімі вайскоўцамі бойню ў Сангмі, пасля чаго стаў лаўрэатам Пулітцэраўскай прэміі. Працаваў у агенцтвах Юпі і АП, у газеце «Нью-Ёрк Таймс», у апошнія гады — аглядальнік штотыднёвіка «Нью-Ёркер». З яго артыкулаў у часопісе «Нью-Ёркер» свет упершыню даведаўся аб жорсткім абыходжанні амерыканскіх ваенных з іракскімі зняволенымі ў турме «Абу-Грэйб». У маі 2015 года выступіў у London Review of Books з артыкулам, у якім падвергнуў сумневу афіцыйную версію ўладаў ЗША аб ліквідацыі Усамы бен Ладэна.
Аўтар некалькіх публіцыстычных кніг і дакументальных фільмаў. Лічыцца адным з лепшых амерыканскіх аўтараў, якія працуюць у жанры журналісцкага расследавання.