Пітэр Лелі (англ.: Peter Lely, сапраўднае імя Пітэр ван дэр Фес, нідэрл.: Pieter van der Faes; 14 верасня 1618, Зост, Германія — 30 лістапада 1680, Лондан) — англійскі жывапісец галандскага паходжання, вядучы англійскі партрэтыст XVII стагоддзя.
Пітэр Лелі нарадзіўся ў Зосце ў 1618 годзе. Атрымаў мастацкую адукацыю ў Харлеме, дзе ён быў вучнем Пітэра Франса дэ Грэбера. Ён стаў майстрам Гільдыі Святога Лукі ў Харлеме ў 1637 годзе. Карціны з яго галандскага перыяду жыцця, якія з упэўненасцю можна вызначыць, як працы Лелі, да гэтага часу невядомыя. У 1641 годзе перабіраецца ў Англію, дзе выступае як прадаўжальнік творчасці ван Дэйка. Партрэтны жывапіс у Англіі, які расквітнеў у XVIII стагоддзі, у XVII стагоддзі выконваўся выключна замежнымі майстрамі, якія знаходзілі шматлікую кліентуру пры каралеўскім двары.
Першыя вядомыя жанравыя палотны Лелі нясуць выразны ўплыў Караваджа і яго паслядоўнікаў у Утрэхце. Але ўжо ў сваім першым партрэце мастак паказвае відавочнае падабенства з манерай ван Дэйка, якую ў сваіх наступных працах яшчэ больш развіў. Будучы на службе ў лорда Нартамберленда, капіюе карціны ван Дэйка. У той жа час стварае і шэраг арыгінальных палотнаў. Пасля рэстаўрацыі Сцюартаў, працуе як прыдворны мастак караля Карла II Англійскага. Ён быў прысвечаны ў рыцары ў 1679 годзе.
Сярод яго вучняў былі Джон Грынхіл і Уільям Вісінг.