Новацяру́шскі сельсавет — былая адміністрацыйна-тэрытарыяльная адзінка ў складзе Салігорскага раёна Мінскай вобласці. Цэнтр — вёска Новыя Цярушкі.
Утвораны 20 жніўня 1924 года як Сухамільскі сельсавет у складзе Старобінскага раёна Слуцкай акругі. Цэнтр — вёска Сухая Міля. З 1927 года ў Бабруйскай акруге. Пасля скасавання акруговай сістэмы ў 1930 годзе ў Старобінскім раёне БССР. З 1935 года ў Старобінскім раёне Слуцкай акругі. Пасля ўвядзення абласнога падзелу ў 1938 годзе ў Старобінскім раёне Мінскай вобласці, з 20 верасня 1944 года — Бабруйскай вобласці, з 8 студзеня 1954 года — Мінскай вобласці.
16 ліпеня 1954 года перайменаваны ў Новацярушскі, цэнтр перанесены ў вёску Новыя Цярушкі[1]. Пасля скасавання Старобінскага раёна 25 снежня 1962 года ў складзе Любанскага раёна. 6 студзеня 1965 года Новацярушскі сельсавет за выключэннем населеных пунктаў Бычкі, Новая Дуброва, Новыя Дунцы, Старая Дуброва і Старыя Дунцы ўвайшоў у склад Салігорскага раёна[2].
Скасаваны 23 сакавіка 1987 года, тэрыторыя далучана да Зажэвіцкага сельсавета[3]. На момант скасавання ў склад сельсавета ўваходзілі 8 населеных пунктаў: вёскі Абідземля, Загор’е, Красны Бераг, Крываль, Лесаўня, Новая Грамата, Новыя Цярушкі, пасёлак Крываль.