Міхаіл Аляксандравіч Слямнёў[1] (нар. 15 лістапада 1939, в. Малыя Стайкі, Гарадоцкі раён, Віцебская вобласць) — беларускі вучоны, доктар філасофскіх навук (1982), прафесар (1982). Член Міжнароднай акадэміі арганізацыйных і кіраўніцкіх навук (1994), Міжнароднай акадэміі вывучэння нацыянальных меншасцей (1996)[2].
У 1962 годзе скончыў фізіка-матэматычны факультэт Віцебскага дзяржаўнага педагагічнага інстытута. У 1970 годзе скончыў аспірантуру Інстытута філасофіі і права Акадэміі навук БССР[2]. Працаваў настаўнікам у шэрагу школ, з 1971 года ў Віцебскім педагагічным інстытуце, з 1982 года загадчык кафедры.
У 1991—1995 гадах — дэпутат Вярхоўнага Савета Рэспублікі Беларусь 12-га склікання, старшыня камісіі па нацыянальнай палітыцы і міжнацыянальных адносінах.
У 1995—1997 гадах — генеральны консул Рэспублікі Беларусь у горадзе Беласток (Польшча), потым загадчык кафедры ў Віцебскім філіяле Інстытута сучасных ведаў.
Аўтар больш 100 навуковых прац па філасофскіх пытаннях прыродазнаўства, філасофіі і метадалогіі навукі..